Урганч шаҳрида 4000 кишини сиғдира оладиган жоме масжид қурилмоқда

Ўзбекистон 15:00 / 13.02.2018 11246

Хоразм вилояти маркази Урганч  шаҳридаги “ Охун бобо” жоме масжиди ўтган асрда қурилган бўлиб, вақт ўтиши билан замон талабларига мутлақо жавоб бермайдиган аҳволга келиб  қолганди. Сўнгги йилларда Урганч шаҳрининг архитектура, шаҳарсозлик жиҳатдан тамомила қайтадан қурилаётгани жоме масжидини ҳам янгича, замонавий тарзда бунёд этишни талаб қиларди.

Фото: KUN.UZ
Фото: KUN.UZ
Фото: KUN.UZ

Президент Шавкат Мирзиёев 2017 йилнинг 28 январь куни Хоразм вилоятига амалий ташрифи давомида “Охун бобо” масжиди қурилишининг биринчи тамал тошини шахсан қўйиб, масжиднинг кўркам, барча талаб-эҳтиёжларга жавоб беришини кўзлаб, фикр-мулоҳазалар билдирган эди.

Фото: KUN.UZ
Фото: KUN.UZ
Фото: KUN.UZ

KUN.UZ’га берилган маълумотларга кўра, деярли бир йил муқаддам бошланган хайрли иш ниҳоясига етмоқда. Умумий майдони уч ярим гектарни эгаллаган масжид мажмуасида намозхонлар учун зарур бўлган барча шарт–шароитлар яратишни кўзда тутиб, уч ярим минг кишига мўлжалланган ёзги айвон, қабулхона, автотураргоҳ, ташқи манзаралари яшил майдонлар ташкил қилиняпти.

Фото: KUN.UZ
Фото: KUN.UZ

Масжид чорбурчак шаклида бўлиб, унинг қишки намозхонаси тепасида маҳобатли гумбаз қад ростлади. Масжид ёнида баландлиги қирқ беш метр бўлган минора ҳам бор. Мазкур  масжид Ўзбекистондаги ана шундай энг йирик масжидлардан бири бўлиб, меъморий тузилиши жиҳатдан ўхшаши йўқдир.

Фото: KUN.UZ
Фото: KUN.UZ

Масжид мажмуасининг лойиҳа ҳужжатларига мувофиқ, қурилиш-монтаж, ободонлаштириш ва кўкаламзорлаштириш ишлари олиб борилади. Эътиборли томони, қурилиш жараёнига сарфланадиган барча харажатлар хайрия ва ҳомийлик маблағлари ҳисобидан амалга оширилмоқда.

Фото: KUN.UZ

“Охун бобо ” масжиди Рамазон ҳайити куни фойдаланишга топширилади. Ҳозирда масжид биносида сўнгги таъмирлаш, безаш ишлари амалга оширилмоқда.
 

Хасанбой Кенжаев, 
Урганч шаҳар “Охун бобо” масжиди имом-хатиби