Трамп АҚШнинг ядровий салоҳияти доимо энг кучли бўлиб қолишига амин

Жаҳон 18:30 / 13.02.2018 5335

АҚШ президенти Дональд Трамп келажакда АҚШ ўз ядро қуролларини қисқартиришини исташи, лекин бу ҳол бошқа давлатларнинг ҳам ҳаракатига боғлиқ эканлигини таъкидлаган. Бу ҳақда РИА «Новости» ёзмоқда.

«Умид қиламанки, яқин йилларда биз уларни (ядро қуролларини) қисқартира оламиз, лекин бу бошқалар нима ҳаракат қилишига ҳам жуда боғлиқ. Биз доимо бу борада биринчи рақамлимиз… ва бошқалардан анча олдинда бўламиз», — деган Трамп душанба куни Оқ уйда АҚШ инфратузилмаси лойиҳасини кабинет аъзолари ва губернаторларга тақдим этар экан.

АҚШ президентининг таъкидлашича, АҚШ ядровий кучларнинг мавжудларини модернизация қилади ва янгиларини яратади. Трамп мамлакат шундай қилишга мажбурлигини, чунки бошқалар айнан шундай йўл тутаётганини таъкидалади.

«Агар улар тўхтаса, биз ҳам тўхтаймиз, лекин улар тўхтамаяпти, шу сабабли биз ядровий имкониятлар борасида ҳаммадан илғор бўлишимиз керак… Умид қиламанки, улар тўхташади, агар улар тўхтаса биз икки дақиқада тўхтаймиз. Очиғини айтганда, мен ядровий каллакларнинг катта қисмидан воз кечиш тарафдориман, лекин бу ишни улар бошлаб бериши керак, шунда биз уларга эргашамиз», — деган Трамп айнан қайси давлатларни назарда тутаётганига аниқлик киритмасдан.

Трамп ядровий учлик (сув, ер ва ҳаводаги кучлар)ни модернизация қилиш учун 24 миллиард доллар сўраган. Бу 2019 молия йили учун душанба куни Америка маъмурияти томонидан намойиш этилган бюджет лойиҳасида ўз аксини топган.

Ҳужжатда мудофаа вазирлиги учун модернизация ва ядровий учликни қўллаб туриш мақсадида 24 миллиард доллар сўралгани қайд этилган.

2019 молия йили 2018 йил октябрида бошланади. Гап Трамп маъмуриятининг Конгресс томонидан кўриб чиқиладиган таклифи ҳақида бормоқда. Бюджет лойиҳалари Конгресс томонидан кўриб чиқилганидан сўнг, одатда ўзгаришларга дучор бўлади.

Февраль ойи бошида Пентагон АҚШ ҳарбий доктринасини эълон қилди ва унда Россия ядровий кучларининг ривожланишига катта эътибор қаратилган. Пентагонда бошқа потенциал таҳдидлар сифатида КХДР, Эрон ва Хитой тилга олинган.