Hyundai bosh dizayneri Lyuk Donkervolke va Koreya markasining tadqiqotlar hamda ishlanmalar markazi rahbari Yang U Chxol Wheels nashriga berilgan intervyuda superkar loyihasi ustida ish olib borilayotganini tasdiqladi. Kutilishcha, Genesis brendi ostida chiqariladigan yangilik Ferrari va Porsche bilan raqobatga kirishadi.

Avtomobil dizayni ikki o‘rindiqli kupe ko‘rinishida yaratiladi. Orqa uzatmali sportkarni gibridli kuch qurilmasi harakatga keltiradi, u benzinli dvigatel va bir necha elektrmotordan iborat bo‘ladi.

Mashinani BMW M sobiq rahbari Albert Birmann rahbarlik qilayotgan N sport bo‘linmasi ishlab chiqadi. Biroq superkar yuqori quvvatlar tufayli alohida modelga aylanishi kutilmoqda.

Genesis qatorida superkar paydo bo‘lishiga doir ma'lumot ilk bor 2016 yilda tarqalgandi. Hyundai’ning mahsulotlarni rejalashtirish bo‘yicha vitse-prezidenti Mayk O'Brayyen shunday avtomobil ishlab chiqilishi haqida aytib o‘tgan.