Janubiy Koreyaning Hyundai va Kia avtomobillari 2019 yildan e'tiboran virtual yordamchilarga ega bo‘ladi. Sun'iy intellektni Kremniy vodiysidagi SoundHound kompaniyasi ishlab chiqadi. Ayni kompaniya Siri yoki Alexa kabi chatbotlarni tuzishda ishtirok etmoqda.

Avtomobil ovozli yordamchisi eshikni ochib, yopadi. Salondagi haroratni bir me'yorga keltiradi, yo‘l yo‘nalishini aytadi, uchrashuvlar va joriy ishlarni yodga soladi. Aqlli uy jihozlarini masofadan boshqaradi hamda Alexa chatboti qila oladigan ishlar, yangiliklar va ob-havo haqida so‘zlaydi. 

Garchi bu avtomobillar uchun ilk ovozli yordamchi bo‘lmasa-da, SoundHound ishlab chiqarayotgan virtual yordamchi bir necha buyruqni bir vaqtning o‘zida tushunishi kerak. Masalan, haydovchi chiroqlarni yoqishni va ob-havo haqida so‘rasa, tizim ikki talabni ham bir vaqtda bajarishi lozim bo‘ladi, deb yozadi TechCrunch.

Intelligent Personal Assistant deb nomlanuvchi sun'iy intellekt 2018 yilning ilk ko‘rgazmasi - CES 2018’da rasman namoyish etiladi. Sinov ishlari ham 2019 yilda yetkazib berishga ulgurish uchun shu yili boshlanadi.
 
So‘nggi vaqtlarda Hyundai kompaniyasi ko‘p-ko‘p va'da bermoqda: yaqinda kelasi 8 yilda avtomobil bozoriga 38 ta yangi elektromobilni taqdim etishini bildirgan edi. Uning 7 tasi yaqin 5 yilda paydo bo‘lishi kerak. Bu Osiyo ishlab chiqaruvchisini elektromobillar ishlab chiqarish sohasida ham yetakchiga aylantirishi kerak.