AQShning Konnektikut shtatidagi Stemford shahri ma'muriyati yo‘lda SMS-xabarlarni yozib, o‘zi va boshqalarni xatarga qo‘yadigan piyodalarni jarimaga tortishni taklif qildi. Bu haqda International Business Times xabar bermoqda.

Yangi qonun yirik ko‘chalar yonida xabarlar yozadigan yoki telefon orqali suhbatlashadigan barchaga tegishli bo‘ladi. Qayd etilishicha, Honoluluda shunga o‘xshash loyiha tasdiqlangan va 2017 yilning oktabrida kuchga kiradi – o‘z smartfoni tufayli yon-atrofiga qaramaydigan piyodalar 30 dollarlik jarimaga tortiladi.

O‘tgan yili YTHda piyodalar o‘rtasidagi qurbonlar soni 11 foizga o‘sdi va taxminan 6 ming kishini tashkil etdi. Agarda Konnektikutda ushbu qonun loyihasi qabul qilinsa, uni Amerika Qo‘shma Shtatlarning barcha hududi bo‘ylab tarqatish imkoniyati paydo bo‘ladi.

Avvalroq dunyodagi eng ommabop smartfon nomi ma'lum qilingandi.