Hindistonlik o‘smir dunyodagi eng kichik sun'iy yo‘ldoshni yasadi. Uning bu ishlanmasi haqida The Telegraph nashri xabar bermoqda. 

15 yoshli Rifat Shaaruk 3D-printerda uglerod tolasidan bosib chiqarilgan detallardan 64 grammli sun'iy yo‘ldosh yasadi. U bu ishlanmasi bilan NASA tomondan o‘tkaziladigan Cubes in Space tanlovida g‘olib bo‘ldi. Rifat o‘z ijod mahsulini Hindistonning sobiq prezidenti Abdul Kalam sharafiga KalamSat deb atadi.

Sun'iy yo‘ldoshda bort kompyuteri, Yerning tezlanishi, aylanishi va magnitosferasini o‘lchovchi 8 ta datchik o‘rnatilgan. Sun'iy yo‘ldosh iyunda NASA’ning sinov markazi joylashgan Uollops orolidan uchiriladi. U 4 soatlik suborbital parvozni amalga oshirib, uning davomida 12 daqiqa mikrogravitatsiya sharoitida o‘tkazadi.