Qozog‘iston prezidenti amnistiya haqidagi qonunni imzoladi

Qozog‘iston prezidenti Nursulton Nazarboyev 13 dekabrda "Qozog‘iston Respublikasi mustaqilligining 25 yilligi munosabati bilan amnistiya haqida"gi qonunni imzoladi, deb xabar bermoqda Nazarboyev matbuot xizmati.

"Yurtdoshlarimizga nisbatan bu rahmdillik, umid va afv etish amali jamiyatni sog‘lomlashtirishga imkon beradi. Amnistiya ijtimoiy zaif toifalarni, ya'ni balog‘atga yetmaganlar, homilador va bolali ayollar, nogironlar, keksa kishilarni qamrab oladi", deb aytdi Nazarboyev. 

Nazarboyev mustaqillik yillari davomida 8 marotaba amnistiya e'lon qilinganini ta'kidlab o‘tdi.

"Amnistiya hammasi bo‘lib 28 ming kishini qamrab oladi. Bu Mustaqilligimiz yubileyi arafasida muhim insonparvarlik aksiyasidir", deb ta'kidlab o‘tdi Nazarboyev.  

Qozog‘iston prezidenti 1500 kishi axloq-tuzatish muassasalaridan ozod qilinishi, ulardan 80 foizi maxsus (probatsiya) xizmatlar nazoratida bo‘lishini aytdi. 

"Ularning barchasi bizning fuqarolardir. Ularga tuzalish yo‘liga turishga va jamiyatda o‘z o‘rnini topishga imkon berish kerak. Biz barchamiz ularga yordam berishimiz lozim. Umid qilamanki, afv etilganlar kelgusida boshqa qonunbuzarliklarga yo‘l qo‘ymaydilar", deb o‘z so‘zlarini nihoyaladi Nazarboyev. 

Nazarboyev Mustaqillik yillari davomida mamlakatda qonunchilikning insonparvarlashuvi yo‘lida katta ish qilinganini qayd qilib o‘tdi.