Turkiyaning ATV kanali universitetlardan birining talabalari mamlakatdagi harbiy to‘ntaruv harakatiga aloqador bo‘lishi ehtimoli borligi to‘g‘risida syujyet taqdim qildi. Rolikda talabalar yotoqxonasida topilgan hujjatlar ko‘rsatilgan, ularning orasida GTA IV o‘yini chit-kodlari tushirilgan qog‘oz diqqatni tortgan. 

Jurnalist ushbu qog‘ozning yuqori qismida o‘yin nomi yozilganini namoyish etdi. Pastki qismida esa “hayot”, “muhofaza”, “tank”, “qurol” va “pullar” so‘zlari yozilgan. Muxbirning so‘zlariga ko‘ra, bu talabalarning harbiy to‘ntaruvga aloqasi borligidan dalolat berishi mumkin. 

16 iyulga o‘tar kechasi Turkiyada hukumat tomonidan bostirilgan harbiy to‘ntaruv harakati bo‘lib o‘tdi. Isyon davomida 246 nafar kishi halok bo‘ldi, yana 2,1 ming kishi jarohat oldi. Shundan so‘ng mamlakatda taxminan 60 ming harbiy, politsiyachi, sudya, amaldor va muallim o‘z lavozimidan chetlatildi.