«Yuventus» jamoasi yarim himoyachisi Pol Pogba «Manchester Yunayted»ga o‘tish arafasida turibdi.

Daily Mail ma'lumotiga ko‘ra, ayni vaqtda ta'tilni Floridada o‘tkazayotgan fransiyalik futbolchi Los-Anjyelesda manchesterliklar jamoasi uchun tibbiy ko‘rikdan o‘tadi.

Bundan oldinroq Football Italia nashri  «MYu» futbolchining agenti Mino Rayola bilan kelishuvga erishib bo‘lgani va yaqin vaqt ichida transfer haqida e'lon qilinishi aytilgandi. Pogba uchun turinliklar jamoasiga 110 million yevro, transferni hal qilgani uchun Mino Rayolaga transfer qiymatining 20 foizi to‘lanadi.

Bundan tashqari, «Yuventus» Pogbaning «MYu» bilan shartnomani uzaytirishi va u «Oltin to‘p»ni qo‘lga kiritishi evaziga qo‘shimcha bonuslar oladi.

«Qizil iblislar» Pogba bilan 5 yillik shartnoma tuzadi va uning haftalik maoshi miqdori 290 ming funtni tashkil etadi.

«Yuventus» soliqlar tufayli transfer qiymatini 110 million yevro emas, 100 million yevro deb e'lon qiladi.

Pogba 2012 yilda «MYu» erkin agent sifatida tark etgandi. Futbolchini tayyorlab bergani uchun «Yuventus» mankunianliklarga 800 ming funt miqdorida kompensatsiya to‘lagan.

Pogba o‘tgan mavsumda jamoasining 42 uchrashuvida maydonga tushib, 10 gol urgan va 12ta golli pas muallifi bo‘lgan.

Manba: Tribuna.uz