Olamsport.com sayti o‘zbekistonlik sportchilar Rio—2016 Olimpiadasida qo‘lga kiritadigan medallari uchun qancha miqdordagi mukofot puli olishi ma'lum qilingani haqida xabar tarqatdi.

Xabarda yozilishicha, Braziliyaning Rio-de-Janeyro shahri mezbonligidagi yozgi olimpiya o‘yinlarida oltin medalga ega chiqqan o‘zbekistonlik sportchi 200 ming AQSh dollarini qo‘lga kiritadi.

Kumush medal uchun 100 000 dollar va'da qilingan, musobaqalarda kuchli uchtalikka kirib, bronza medalini qo‘lga kiritgan sportchiga esa 75 ming AQSh dollari miqdoridagi mukofot beriladi.

XXXI yozgi Olimpiada o‘yinlari 5 avgust kuni start olib, 21 avgustga qadar davom etadi. Unda O‘zbekiston sharafini 70 nafar sportchi himoya qiladi.

Paralimpiya o‘yinlari esa 7−18 sentabr kunlari bo‘lib o‘tadi. Bu o‘yinlarda O‘zbekiston nomidan 52 sportchi ishtirok etadi.

Bundan oldinroq, O‘zbekiston bosh vaziri Shavkat Mirziyoyev va Milliy Olimpiya qo‘mitasi prezidenti Mirabror Usmonov ishtirokida Toshkentda olimpiyachi va paralimpiyachilarni kuzatish marosimi o‘tkazilgani haqida xabar berilgandi.