Kembridj universitetining Psixometriya markazi tadqiqotchilari inson aqliy salohiyatini uning ijtimoiy tarmoqlardagi profil suratlari asnosida aniqlovchi algoritm yaratishdi. Ular aynan qaysi omillar kishilarga "aqlli" tus berishiga oydinlik kiritishdi. Bunday suratlarni har qanday messenjerdagi "ava surati"ga ham va hattoki rezyumedagi suratga ajratilgan joyga ham qo‘llash mumkin.

Tahlil yuzdagi a'zolarni o‘rganish bilangina cheklanib qolmaydi. Dastur suratga tushish vaqtidagi holat, kiyim, shuningdek kadrda do‘stlar yoki qarindosh-urug‘larning borligini ham inobatga oladi. Bularning barchasi algoritmga insonning hayot tarzi va o‘zini atrofdagilarga qanday ko‘rsatishni istashiga doir ma'lumotlarni yetkazib beradi. 

Tadqiqot davomida IQ darajasiga test sinovidan o‘tgan Facebook foydalanuvchilarining 1122ta surati tahlil qilindi, shundan so‘ng aqliy salohiyat darajasi haqidagi xulosa taqdim etildi. 

Ma'lum bo‘lishicha, atrofdagilarning aqliy salohiyatiga baho beruvchi odatiy belgilar (masalan, ko‘zoynakli taqish) aslida haqiqatga to‘g‘ri kelmaydi. Tadqiqotchilar yangi dasturga nafaqat haqiqiy IQ darajasini belgilash, balki ularning atrofdagilarga qanchalik aqlli ko‘rinishini ham muvaffaqiyatli aniqlashni "o‘rgatib qo‘yishdi". 

Mualliflarning so‘zlariga ko‘ra, aqlli kishilar ijtimoiy tarmoqlardagi profil suratlari juda muhimligini yaxshi anglab yetishadi, shu bois kadrda ortiqcha odamlarsiz neytral fondagi tiniq suratlarni tanlashadi. Bundan tashqari, ham yuqori IQ darajasiga ega, ham atrofdagilar tomonidan shunday qabul qilinadigan kishilar ijtimoiy tarmoqlarda odatda pushti, qizil yoki siyohrang ishtirok etgan suratlarni chetlab, yashil rang qatnashgan (yoki yashil fondagi) suratlarni yuklashgani ma'lum bo‘ldi.