Bugun Yevropa chempionatining birinchi finalchisi aniqlanadi. Lionda Toshkent vaqti bilan23:55da Portugaliya hamda Uels terma jamoalari o‘rtasidagi o‘yin boshlanadi. Bu o‘yinda nafaqat Yevropa chempionatining finalchisi aniqlanadi, balki...

Har ikki jamoa yetakchilari Krishtianu Ronaldu hamda Garet Beyl «Real»da ajoyib mavsum o‘tkazishdi va chempionlar ligasida g‘alaba qozonishdi. Shu sabab har ikki futbolchida ham jahon va Yevropaning eng yaxshi futbolchisi bo‘lish imkoniyati yuqori.

Portugaliya musobaqani «F» guruhida juda omadsiz boshlandi. Dastlabki ikki o‘yinda nursiz o‘yin ko‘rsatgan Santush shogirdlari Islandiya va Avstriya bilan 1:1 o‘ynashdi. Oxirgi turdagina ularning o‘yini ochildi, lekin Vengriya bilan ham 3:3 hisobida durang natina qayd etildi. Biroq uch ochko Portugaliyaga guruhdan chiqish imkonini berdi.

Krishtianu Ronaldu jamoasi 1/8 finalda Xorvatiyaga to‘qnash keldi. O‘yinning asosiy vaqtida hisob ochilmadi. Qo‘shimcha bo‘limlarning oxirgi daqiqalari o‘tib borayotganda esa Rikardo Kuarejma jamoasiga g‘alaba keltirgan golni kiritdi. 1/4 finalda Portugaliya Polsha bilan bahs olib bordi. Bu o‘yinning asosiy va qo‘shimcha vaqtlari 1:1 hisobida yakunlandi. Penaltilar seriyasida Portugaliyaning omadi keldi. Shunday qilib Ronaldu jamoadoshlari birorta ham o‘yinning asosiy vaqtida g‘alaba qozonmay, Yevropa chempionatining yarim finaligacha yetib keldi.

Uels Yevropa chempionatini «V» guruhida boshladi. Birinchi turda Kris Kolman shogirdlari Slovakiyani 2:1 hisobida mag‘lub etishdi. Ikkinchi tursa esa Angliyaga 1:2 hisobida yengilishdi. Uchinchi turda Rossiyani 3:0 hisobida taslim qilgan Garet Beyl jamoadoshlari guruhda birinchi o‘rinni egallashdi.
Ularga 1/8 finalda Shimoliy Irlandiya raqiblik qildi. Bu bahsda Uels 1:0 hisobida g‘alaba qozondi. 1/4 finalda esa jamoa musobaqadagi eng ajoyib o‘yinini ko‘rsatib, Belgiyadan 3:1 hisobida ustun keldi.

Portugaliya hamda Uels terma jamoalari o‘rtasidagi o‘yindan olib boriladigan onlayn translyatsiyani tribuna.uz saytida kuzatib boring.