Bugun, 2 iyul kuni Yevropa chempionatining yana bir yarim finalchisi aniqlanadi. Toshkent vaqti bilan soat 23:55da Bordo shahrida, Germaniya hamda Italiya terma jamoalari o‘rtasidagi o‘yin boshlanadi.
Bu o‘yinni butun musobaqaning markaziy bahsi deyish mumkin. Chunki finalda ham bu darajadagi kuchli jamoalar to‘qnash kelmasligi aniq bo‘lgan. Germaniya amaldagi jahon chempioni hisoblanadi va Yevropa chempionatining ham asosiy favoriti. Nemislar Fransiya va Ispaniyaning ajoyib natijasini takrorlab, Jahon va Yevropa chempionatlarida ketma-ket g‘alaba qozona olishadimi?
Bu ikki jamoa yirik musobaqalarning pley-offida tez-tez to‘qnash kelib turishadi. Lekin shu vaqtgacha bo‘lib o‘tgan to‘qnashuvlarda faqat italiyaliklar ustun kelgan.
O‘tgan Yevropa chempionatida Italiya Mario Balotellining dubli evaziga Germaniyadan ustun kelgandi. 2006 yilgi Jahon chempionatining yarim finalida ham Italiya va Germaniya to‘qnash kelgan. O‘sha o‘yinda ham Italiya Fabio Grosso hamda Alesandro Del Peroning gollari evaziga 2:0 hisobida g‘alaba qozongandi.
1970 yilgi JCh yarim finalida to‘qnashgan jamoalar uchrashuvida italiyaliklar 4:3 hisobida g‘alaba qozongan. 1982 yilda esa JCh finaida Italiya Germaniyani 3:1 hisobida mag‘lubiyatga uchratgandi.
Jahon va Yevropa chempionatlarida ikkala terma jamoa 8 marta kuch sinashgan. Italiya 4 marta g‘alaba qozongan, 4ta o‘yin durang natija bilan yakunlangan.
Umuman olib qaraganda esa, Germaniya va Italiya jami 33 marta o‘ynagan. Italiyada 15 g‘alaba, Germaniyada 8 g‘alaba, 10ta durang. To‘plar nisbati 40:49.
Nemislar bu qora an'anaga barham bera olishadimi? Mana shu savollarga bugungi ajoyib o‘yinda javob olamiz.
Yana bir qiziq ma'lumot. Germaniya Yevropa chempionatlari chorakfinalida hech qachon mag‘lub bo‘lmagan.
Germaniya Yevropa chempiontini «C» guruhida boshladi. Shimoliy Irlandiya va Ukrainani mag‘lub etgan nemislar Polsha bilan durang o‘ynashdi. Shu tariqa Germaniya guruhda birinchi bo‘ldi. Chorak finalda Lyov shogirdlariga Slovakiya raqiblik qildi. To‘g‘rirog‘i, raqiblik qila olmadi va nemislar 3:0 hisobida g‘alaba qozonishdi. E'tiborlisi, Noyyer Yevropa chempionatida hali birorta ham gol o‘tkazib yuborgani yo‘q.
Italiya esa musobaqani «Ye» guruhida boshladi. Belgiya va Shvetsiyani mag‘lub etgan italyanlar oxirgi turda Irlandiyaga yengilishdi. Shu tariqa, ular o‘z kvartetlarida birinchi bo‘lishdi. 1/8 finalda Konte shogirdlari Ispaniya bilan o‘ynashdi va katta ustunlikka ega bo‘lgan holda 2:0 hisobida raqibdan ustun kelishdi.
Tribuna.uz saytida ushbu o‘yindan matnli translyatsiya uyushtiriladi.
