Bugun Yevropa chempionati o‘yinlari davom ettiriladi. Toshkent vaqti bilan 23:55da Marselda Polsha hamda Portugaliya terma jamoalari o‘zaro o‘yinda maydonga tushishadi va ilk yarim finalchi kim bo‘lishi aniq bo‘ladi.

O‘yinga bo‘lgan qiziqish juda katta. Eslatib o‘tamiz, Polsha musobaqani "C" guruhida boshladi va Germaniyadan keyin ikkinchi bo‘ldi. Ular Shimoliy Irlandiya va Ukrainadan ustun kelib, Germaniya bilan durang o‘ynashdi. Shu tarzda Polsha nemislar bilan bir xil ochko to‘pladi. Levandovskiy jamoasi 1/8 finalda Shveytsariya bilan bahslashdi va penaltilar seriyasiga ko‘ra chorak finalga yo‘l oldi.

Portugaliya esa Yevropa chempionatini "F" guruhida boshladi. Krishtianu Ronaldu jamoasi barcha uchta o‘yinda: Vengriya, Islandiya va Avstriya bilan durang o‘ynadi. 1/8 finalda esa ular Xorvatiyaga to‘qnash kelishdi. O‘yinning asosiy vaqtida hisob ochilmadi, lekin qo‘shimcha taymlarning oxirgi daqiqalari o‘tayotganda Rikardo Kuarejma gol urib, Portugaliyani chorak finalga olib chiqdi.

Polmsha hamda Portugaliya terma jamoalari o‘rtasidagi o‘yinni kuzatish imkoningiz bo‘lmasa, tribuna.uz saytida olib boriladigan matnli translyatsiyani kuzatib boring.