Shanxay hamkorlik tashkilotining (ShHT) Toshkentdagi sammiti uning rivojlanish yo‘lidagi yangi yo‘nalishini aniqlab beradi hamda kun tartibidagi asosiy mintaqaviy va xalqaro masalalarni muhokama qilish imkonini yaratadi. Bu haqida ShHT bosh kotibi Rashid Alimov TASS muxbiri bilan kechgan suhbatda ma'lum qildi. 

"Biz hozir bor e'tiborimizni yilning eng muhim voqeasi - Toshkentda sammitni o‘tkazishga qaratyapmiz, - dedi u. - Bu 15 yillik yubiley sammiti, shu bois biz unga ikki barobar ko‘p kuch sarflayapmiz. Har qanday yubiley singari bu ham shu vaqt ichida qanday ishlar amalga oshirilgani va nimalar qilinishi kerakligini tahlil qilish imkonini beradi". 

"Tashkilotga a'zo mamlakatlar rahbarlari kun tartibiga qo‘yilgan muhim xalqaro va mintaqaviy masalalarni muhokama qilish uchun O‘zbekistonning poytaxtida yig‘ilishadi, - deya davom ettirdi Alimov. - Toshkentda o‘tkaziladigan sammit Shanxay hamkorlik tashkiloti taraqqiyotining yangi yo‘nalishini belgilab beradi".

ShHT o‘zining 15 yilligini nishonlaydi. ShHT 18ta mamlakatni birlashtiradi, bu dunyo aholisining 44 foizi demakdir. Bugungi kunda ShHTning teng huquqli a'zolari - O‘zbekiston, Qozog‘iston, Qirg‘iziston, Tojikiston, Rossiya va Xitoy. Afg‘oniston, Belorusiya, Hindiston, Eron, Mo‘g‘uliston va Pokiston mamlakatlari kuzatuvchi maqomiga ega. Muloqot bo‘yicha sherik maqomi esa Ozarbayjon, Armaniston, Kambodja, Nepal, Turkiya, Shri-Lankaga taqdim etilgan. ShHTning 15 yillik sammiti 23-24 iyun kunlari Toshkentda bo‘lib o‘tadi.