FIFA, Italiya bosh vaziri va Yevropaning bir qator grand jamoalari «Lester»ni chempionlik bilan tabrikladi
3 mayga o‘tar kechasi «Chelsi» va «Tottenhem» o‘rtasidagi 36-tur uchrashuvi uchun hakam hushtagi yangragach, «Lester» avtomatik ravishda mavsum chempioniga aylandi. «Lester» Angliya chempionligini qo‘lga kiritgan 24-jamoaga aylandi. Bu haqda dastlab Angliya premer-ligasining tvitteri ma'lum qildi.
Premer-liga: Endi ularni hech kim quvib yetolmaydi.
No one can catch them now... pic.twitter.com/5xLJiz9lrC
— Premier League (@premierleague) 2 maya 2016 g.
Shu vaqtda xalqaro futbol federatsiyasi (FIFA) rasmiy sayti ham jamoani tabrikladi.
FIFA rasmiy sayti Angliya Premer-ligasi boshlanishidan avval bukmekerlarning kotirovkasini yodga soldi. «Mavsum boshida angliyalik bukmekerlar «Lester»ning chempionligini 5 000ga 1 koeffitsiyentga baholagan. Xuddi shunday ehtimol bilan biz Elvis Preslini tirik holda topishimiz yoki Lox-ness maxluqi bor ekanini isbotlashimiz mumkin edi», – deyiladi xabarda.
Dunyodagi turli jamoalar birin-ketin «Lester»ni tabriklay boshlashdi. «Manchester Siti», «Tottenhem», «Chelsi», «Roma», «Borussiya D», «Rostov» va boshqalar shu jumladan.
Italiya bosh vaziri Matteo Rentsi «Lester»ning chempionligi Angliya futboli tarixidagi eng yorqin sahifalaridan biri ekanini ta'kidladi. Shuningdek, Rentsi «Lester»ning muvaffaqiyatini yaratgan jamoa bosh murabbiyi va hamyurti Klaudio Raneriga o‘z tabriklarini yo‘lladi.
«Chelsi» muxlisi hisoblanadigan taniqli teleboshlovchi Jyeremi Klarksson, «MYu»ning sobiq futbolchilari Devid Bekhem, Rio Ferdinand, Robin van Persi va Peter Shmeyxel, «Lester» afsonasi Gari Lineker hamda boshqa taniqli shaxslar o‘z tvitterlarida «tulkilar»ni mavsum chempionligi bilan birinchilardan bo‘lib muborakbod etishdi.
Qayd etish joiz, o‘tgan mavsumda «Lester» Nayjyel Pirson qo‘li ostida Angliya chempionatini 14-o‘rinda yakunlagan edi. Klubning avvalgi eng yuqori natijasi 1928/29 yilgi mavsumda qayd etilgan bo‘lib, jamoa Angliyaning yuqori ligasida (1892 yildan 1992 yilgacha yuqori liga nomi birinchi divizion deb atalgan) ikkinchi o‘rinni egallagan edi.
«Lester» bosh murabbiyi, italiyalik Klaudio Raneri uchun ham mazkur chempionlik faoliyatidagi birinchisi bo‘ldi. Bundan avval 64 yoshli mutaxassis Ispaniyaning «Valensiya» va «Atletiko», Italiyaning «Parma», «Yuventus», «Roma», «Inter», «Fiorentina», «Napoli» va «Kalyari», Fransiyaning «Monako» hamda Angliyaning «Chelsi» klublarida faoliyat olib borgan, barcha ligalarda turli kuboklarga ega bo‘lgan, ammo birortasida ham mamlakat chempioni bo‘la olmagandi.
