Angliya chempionatining 35-turida "Liverpul" o‘z maydonida "Nyukasl" bilan 2:2 hisobida durang natija qayd qildi.

Yurgen Klopp shogirdlari 1-bo‘limdayoq raqib darvozasiga ikkita to‘p urishdi: Deniyel Starrij va Adam Lallana o‘z hisoblariga bittadan to‘p yozib qo‘yishdi. Biroq 2-bo‘limda " "Nyukasl" o‘yinchilari Papissa Sisse va Jyek Kolbek o‘z gollari bilan jamoalariga durang natija olib kelishdi.

"Liverpul" 55 ochko bilan 7-o‘rindan, "Nyukasl" esa 19-o‘rindan joy olmoqda.

"Manchester Siti" esa o‘z maydonida "Stok Siti"ni kutib oldi va 4:0 hisobidagi yirik g‘alabani qo‘lga kiritdi.

"Shaharliklar" safida gollarni Fernando, Serxio Aguero, Kelechi Ixeanacho (dubl) kiritdilar.

Aguero penaltidan chempionatdagi 23-golini kiritdi. U bu goli evaziga to‘purarlar ro‘yxatida "Lester" o‘yinchisi Jyeymi Vardidan (22 gol) o‘tib ketdi va 1-o‘rinni egallayotgan Garri Keynga (24 ta gol) yaqinlashdi.

"Manchester Siti" (64 ochko) "Arsenal"dan o‘tib, musobaqa jadvalining 3-o‘riniga ko‘tarilib oldi, "Stok" esa (47 ochko) 9-o‘rinda qoldi.

Qolgan uchrashuvlarda "Chelsi" mehmonda "Bornmut"ni 1:4 hisobida yutdi, "Aston Villa" esa o‘z maydonida "Sautgempton"ga 2:4 hisobida yutqazdi.

Angliya Premer-ligasi. 35-tur

Liverpul – Nyukasl Yunayted – 2:2
Gollar: Starrij, 2 (1:0); Lallana, 30 (2:0); Sisse, 48 (2:1); Kolbek, 66 (2:2).

Manchester Siti – Stok Siti – 4:0
Gollar: Fernando, 35 (1:0); Aguero, 43 (2:0, pen); Ixeanacho, 64 (3:0); Ixeanacho, 74 (4:0).

Bornmut (Bornmut) – Chelsi (London) – 1:4
Gollar: Rodriges, 5 (0:1); Azar, 34 (0:2); Elfik, 36 (1:2); Villian, 71 (1:3); Azar, 90+1 (1:4).

Aston Villa – Sautgempton– 2:4
Gollar: Long, 15 (0:1); Tadich, 39 (0:2); Vestvud, 45+1 (1:2); Tadich, 71 (1:3); Vestvud, 85 (2:3); Mane, 90+4 (2:4).