Dunyoda yagona nusxadagi «Betmobil» Rossiyada sotuvga qo‘yildi. Bu haqda Auto.ru saytida xabar qilingan.

«Betmen Supermenga qarshi: Adolat tongida» filmi bosh qahramoni uchun tayyorlangan bu avtomobil uchun 1 mln yevro (75 690 200 rubl) narx belgilangan.

Avtomobil General Motors tomonidan Warner Bros. kinokompaniyasi buyurtmasiga ko‘ra tayyorlangan. U soatiga 250-330 kilometr tezlikda harakatlana oladi.

«Betmobil»ning uzunligi olti metrdan ortiq, og‘irligi esa 3175 kilogrammga teng.

1960 yillarning Betmen haqidagi fantastik teleseriali uchun yaratilgan Betmobil 2013 yili AQShdagi kimoshdi savdosida rekord darajadagi 4,6 million dollarga sotilgandi.