AQSh huquq-tartibot muassasalari Kaliforniyaning Anaxaym shahrida "Ku-kluks-klan" vakillari ishtirokidagi mushtlashuvdan keyin 13 kishini qo‘lga oldi. Mushtlashuv oqibatida 3 kishi jarohat oldi, deb xabar bermoqda Associated Press axborot agentligi.

Politsiyaning ma'lum qilishicha, radikal tashkilot a'zolari avval e'lon qilingan tadbirga kelgan va mashinadan tushganlaridan keyin ularni 30 ga yaqin raqib kutib olgan. Pichoq zarbalari berish aybi bilan "Ku-kluks-klan"ning 6 vakili hibsga olingan. O‘z navbatida, ularning raqiblaridan 7 kishi ham hujumda gumon qilinmoqda.  

"Ku-kluks-klan" a'zosi Kris Barkerning aytishicha, tashkilot a'zolari tinch holdagi aksilmigratsion tadbirni o‘tkazayotgan bo‘lgan, pichoqni esa himoyalanish zarurati sababli ishlatishga to‘g‘ri kelgan.

"Agar bizga hujum qilishsa, biz ham hujum bilan javob beramiz", deb aytdi telefon orqali "Ku-kluks-klan"ning voqeada ishtirok etmagan a'zosi.

Qayd etilishicha, voqea joyidan olingan suratlarda "Ku-kluks-klan"ga tegishli qora yo‘ltanlamas avtomobil raqamini ko‘rish mumkin, raqamdagi KIGY so‘zi esa "klan bo‘yicha birodarim seni qarshilayman" degan ma'noni beradi.

AQShda faoliyat yuritadigan "Ku-kluks-klan" radikal tashkiloti oq tanlilarning boshqa rangdagi qolgan odamlardan ustunligi g‘oyasini ilgari suradi. Asosan qora tanlilarni tahqirlab keladi.