Angliyalik qo‘shiqchi Adel nufuzli Brit Awards 2016 musiqiy mukofotida "Eng yaxshi albom" yo‘nalishida bosh sovrinni qo‘lga kiritdi.

Adel bu sovringa 2015 yilda chiqargan "25" deb nomlangan albomi uchun sazovor bo‘ldi. Adel, shuningdek, "Eng yaxshi britan ijrochisi" deb tan olindi, "Jahon muvaffaqiyati" yo‘nalishida g‘olib bo‘ldi hamda uning "Hello" qo‘shig‘i "Yil singli" deb tan olindi. Adelning nomzodi 5 yo‘nalishga qo‘yilgan edi, qo‘shiqchi undan 4 tasida g‘olib bo‘ldi.

"Bu albomni yaratish haqiqatda juda qiyin bo‘ldi", deb aytdi qo‘shiqchi minnatdorchilik nutqida va o‘z turmush o‘rtog‘iga tashakkur bildirdi.

Brit Awards mukofoti Buyuk Britaniyada bo‘lib o‘tadi va AQShda o‘tkaziladigan "Gremmi" mukofotining britan muqobili hisoblanadi.