2016 yilda Rossiya milliy valyutasining kursi tushishda davom etadi. Bu haqda Sberbank rahbari German Gref “Rossiya 24” telekanaliga bergan intervyusida aytib o‘tdi.
“Aytish mumkinki, yaqin oylarda neft narxi plyus-minus 10 foiz atrofida o‘zgarib turadi”, - dedi u.
U neft narxi AQSh federal zaxira tizimining siyosatiga bog‘liq ekanligini tan oldi.
“Uning siyosati esa qattiqlashib boradi, - so‘zida davom etdi iqtisodiyotchi. – Bu degani, eng yirik derivativ bozor bo‘lmish neft bozoridan dollar keta boshlaydi. Bu degani, monetar holat nuqtai nazaridan neft narxi tushishi kerak, bu mutlaq korrelyatsiyadir va o‘z-o‘zidan rubl kursi ham tushib boradi”.
25 dekabr holatiga ko‘ra birjada 1 dollar 70.33 rublga, 1 yevro 77.02 rublga teng. Rasmiy kurslar, tegishlicha, 69.52 va 76.04 rubl. Brent neftining bir barreli 37.92 dollarga sotilmoqda.