Қашқадарёдаги боғчада 2 ёшли қиз ариққа чўкиб ҳалок бўлди

У назоратсиз қолгани сабабли кўчага чиқиб, боғча атрофидаги ариққа тушиб кетгани айтилмоқда. Прокуратура текширув бошлаган.

Фото: Видеодан кадр

Қашқадарё вилояти, Қамаши туманидаги хусусий боғчада 20 май куни фожиа содир бўлди.

Millar кўрсатуви хабарига кўра, 2 ёшли қиз боғча яқинидаги ариққа чўкиб ҳалок бўлган.

Боғча ходими берган кўрсатмага кўра, болаларнинг ярми ухлатиш учун хонага олиб кирилган, бошқалари ҳовлида қолган. Улардан бири назоратсиз қолгани сабабли кўчага чиқиб, боғча атрофидаги ариққа тушиб кетган.

Бош прокурор матбуот котиби Ҳаёт Шамсутдиновнинг маълум қилишича, вояга етмаган боланинг ўлими сабабини аниқлаш учун суд-тиббий экспертизаси, ҳамда мактабгача таълим ташкилоти ходимлари ҳаракатига баҳо бериш учун идоравий хизмат текшируви тайинланган. Терговга қадар суриштирув тадбирлари ўтказилмоқда.

#Қашқадарё #боғча #болалар #Қамаши тумани