Испания Исроилдан миллионлаб ўқ-дори сотиб олишдан бош тортди

Мамлакат ҳукумати Исроил билан 15,3 млн ўқ-дори харид қилиш бўйича шартнома имзолаган. Аммо Ғазодаги ҳарбий операцияларга норозилик белгиси сифатида ушбу шартнома бекор қилинадиган бўлди.

Фото: Reuters

Испания Исроилнинг Ғазо секторидаги ҳарбий операцияларига норозилик белгиси сифатида мамлакат компанияларидан 15,3 миллион патрон буюртма қилишдан воз кечди, деб ёзади The Guardian.

Қайд этилишича, ҳукуматнинг ушбу қадами Испания фуқаролик гвардиясини ўқ-дориларсиз қолдириши мумкин.

Педро Санчес бошчилигидаги Испания ҳукумати 2023 йил октябрдан бери — Исроил қўшинлари Ғазо секторида ҳарбий операция бошлаганига жавобан, Исроил билан қурол-яроққа алоқадор ҳар қандай шартномани рад этиб келаётган эди. Аммо орадан бир йил ўтиб, Испания Ички ишлар вазирлиги калибри 9 миллиметр бўлган 15,3 миллионта патрон етказиб бериш бўйича Исроилнинг IMI Systems компанияси билан битим имзолади. Бу ҳақда ОАВда хабарлар тарқалгач, ИИВ шартномани бекор қилишга ваъда берди.

Шунга қарамай, 23 апрел куни ИИВ ушбу шартномани бажариш ниятини маълум қилди. Вазирликка кўра, шартнома бундай кеч босқичда бекор қилинса, Исроил томони ўқ-дорилар етказиб бериш учун барибир тўлиқ суммани (6,6 миллион евро) олади, аммо Испания қуролсиз қолиб кетади. Бундан ташқари, ИИВнинг қайд этишича, таъминотнинг узилиши фуқаролик гвардиясининг мамлакатда қонун ва тартибни сақлаш қобилиятига салбий таъсир қилади.

ИИВ баёноти сўл Sumar партиясининг кескин норозилигига сабаб бўлди. Партия етакчиси Иоланда Диас Исроилдан патронлар сотиб олиш — мамлакат ҳукуматининг ички келишувларини «қўпол равишда бузиш» эканини маълум қилди. Бугун, 24 апрел куни Санчес ва Диас вакиллари шартнома бир томонлама тартибда бекор қилинишини эълон қилди.

#Исроил #Испания #патронлар