Афғонистонлик инвесторлар Ўзбекистондаги фирмалар сони бўйича кучли бешликка кирди

2025 йилнинг 1 апрел ҳолатига Ўзбекистонда 15 739 та чет эл инвестицияси иштирокидаги корхона ва ташкилотлар фаолият кўрсатяпти. Бу ҳақда Миллий статистика қўмитаси хабар берди.

Шундан 4031 таси қўшма корхоналар, 11 708 таси хорижий корхоналар ҳисобига тўғри келган.

Хорижий капитал иштирокидаги корхоналар сони март ойи давомида 236 тага ошган. Хусусан, 136 та хитойлик инвесторлар иштирокида янги корхоналар ташкил этилган. Натижада хитойликлар сармоядорлар иштирокидаги умумий тузилмалар сони 3711 тага етган. Бу энг юқори кўрсаткич ҳисобланади.

Бу борада иккинчи ўринда Россия (3033 та фирма) қайд этилган бўлса, кучли учликдан туркиялик инвесторлар (1942 та) ҳам жой олишган.

Хорижий инвесторлар иштирокидаги корхоналар сони бўйича Афғонистон илк бор кучли бешталикка кирди. 1 апрел ҳолатига Ўзбекистонда афғонистонликларнинг қисман ёки тўлиқ иштирокида 672 компания фаолият юритяпти.

Ўзбекистонда фаолият кўрсатаётган хорижий давлатлар капитали иштирокида корхоналар сони:

• Хитой – 3711 та;
• Россия – 3033 та;
• Туркия – 1942 та;
• Қозоғистон – 1082 та;
• Афғонистон – 672 та;
• Жанубий Корея – 663 та;
• БАА – 352 та;
• Тожикистон – 329 та;
• Ҳиндистон – 317 та;
• АҚШ – 310 та;
• Қирғизистон – 309 та;
• Озарбойжон – 278 та;
• Буюк Британия – 240 та;
• Беларус – 230 та;
• Германия – 217 та;
• Туркманистон – 209 та;
• Покистон – 148 та;
• Япония – 92 та.