Орбаннинг рақиби Украинанинг ЕИга аъзолиги бўйича референдум ўтказишни ваъда қилди

Венгриянинг TISZA мухолифат партияси етакчиси Петер Мадярнинг айтишича, агар унинг партияси 2026 йилги сайловларда ғалаба қозонса, Будапештнинг Киевнинг Европа Иттифоқига аъзолик ташаббусини қўллаб-қувватлаши бўйича референдум ўтказилади.

Петер Мадяр Фото: Tibor Illyes/dpa/picture alliance

Венгрия Украинанинг Европа Иттифоқига қўшилиш ташаббусини қўллаб-қувватлаши ҳақидаги қарор мухолифатдаги "Ҳурмат ва эркинлик" партияси (TISZA) 2026 йилда Венгриядаги парламент сайловларида ғалаба қозонса, ўтказадиган референдумдан сўнг қабул қилинади. Бу ҳақда TISZA етакчиси Петер Мадяр 13 апрел, якшанба куни Будапештда минглаб тарафдорлари олдида маълум қилди.

Сўнгги бир неча ҳафта ичида Мадяр тарафдорлари унинг ташаббуси билан ўтказилган Voice of the Nation деб номланган сўровда иштирок этишди. Унда Украинанинг Европа Иттифоқига аъзо бўлиш имкониятлари ҳам муҳокама қилинди.

13 апрелдаги митингда эълон қилинган сўров натижаларига кўра, унинг иштирокчиларининг 58 фоизи Киев аризасини қўллаб-қувватлашга тайёр эканликларини билдирган. Айни пайтда Мадярнинг ўзи 7 март куни Facebookʼдаги саҳифасида: «Украина урушдан вайрон бўлган, яқин бир неча ўн йилликларда Европа Иттифоқига аъзо бўлиш имконияти йўқ», деб ёзганди.

«(Voice of the Nation) сўрови натижалари шуни кўрсатадики, бу жамиятни бўлувчи масала ва шунинг учун биз ҳокимият тепасига келганимизда у қонуний кучга эга бўлган референдумга қўйилади», деди Мадяр Будапештдаги митингда. Унинг маълумотларига кўра, сўровда 1,1 миллион киши иштирок этган. Венгрия аҳолиси - 9,6 миллион киши.

#Венгрия #Петер Мадяр