Blue Origin фақат аёллардан иборат экипаж билан суборбитал парвозни муваффақиятли амалга оширди

Blue Origin компанияси фақат аёллардан иборат экипаж билан New Shepard ракетасининг суборбитал парвозини муваффақиятли амалга оширди, деб хабар беради NBC News.

Қайд этилишича, ракета Техасдаги космодромдан учирилган ва тўлиқ автоматлаштирилган парвоз қарийб 11 дақиқа давом этган. Ракета 105 километр баландликка, яъни Карман чизиғи — Ер атмосфераси ва космос орасидаги шартли чегарадан тахминан 5 километр юқори кўтарилган.

Экипаж таркибидан қўшиқчи Кэти Перри, журналист ва Blue Origin компанияси эгаси Жефф Безоснинг бўлажак турмуш ўртоғи Лорен Санчес, инсон ҳуқуқлари фаоли Аманда Нгуен, аэрокосмик муҳандис Айша Боу, кинопродюссер Кериэнн Флинн, CBS News радиобошловчиси Гэйл Кинг ўрин олган.

Бу New Shepard’нинг бортида экипаж билан 11-суборбитал парвози ҳисобланади. Blue Origin бу каби парвозларни 2021 йилдан бери ташкил этиб келади. Таъкидлашича, бу 1963 йилдан бери (Валентина Терешкованинг биринчи парвози) фақат аёллар иштирок этган биринчи парвоз ҳисобланади.

Эслатиб ўтамиз, 2021 йил июл ойида миллиардер Жефф Безос шахсан Blue Origin компаниясининг New Shepard ракетасида коинотга учганди. Ўшанда у билан бирга бортда унинг акаси Марк, 82 ёшли учувчи Уолли Фанк ва 18 ёшли нидерландиялик Оливер Дэмен бўлган. Жорий йилнинг феврал охирларида эса Blue Origin капсуласи космосга туристик парвозни муваффақиятли амалга оширганди.