«Иккинчи жаҳон урушидан кейин Берлинда бўлгани каби» –Трампнинг махсус вакили Украинада назорат зоналари яратишни таклиф қилди

АҚШ президенти Доналд Трампнинг Украина ва Россия бўйича махсус вакили Кит Келлог Британиянинг The Times газетасига берган интервюсида агар ўт очиш тўхтатилса, Украинада бир нечта назорат зоналари пайдо бўлишини таклиф қилди.

«Бу худди Иккинчи жаҳон урушидан кейин Берлинда руслар зонаси, французлар зонаси, британлар зонаси ва Америка зонаси бўлганидек кўринишда бўлган бўларди», – деди истеъфодаги генерал Кит Келлог. У АҚШ ҳукумати Украинага қуруқлик кучларини юбормаслигини таъкидлаган.

1. Келлогнинг таклифига кўра, Британия ва Франция қўшинлари Украина қўшинлари билан бир қаторда «таъминот кучлари» сифатида Украина ғарбидаги ва Днипро дарёсигача бўлган назорат зонасини эгаллайди. The Times нашри тайёрлаган харитага кўра, бу зона Лвив, Одесса ва Киев каби асосан ғарбдаги ҳудудларни ўз ичига олади.
2. Нашр харитасидан маълум бўлишича, Украина шимоли ва шарқидаги ҳудудлар, жумладан, Суми, Харкив, Днипропетровск ва Запорижжя тўғридан тўғри Украина назорат зонасига киради.
3. Шарқдаги босиб олинган ҳудудлар Россия назорат зонасида қолади.
4. Россия ва Украина ҳудуди ўртасида шарқдаги мавжуд назорат чизиқлари бўйлаб 30 километрлик демилитаризация қилинган ҳудуд бўлади.

The Times газетаси Кит Келлогнинг фикрича, Днипро дарёси ғарбидаги инглиз-француз қўшинлари Москвани «умуман ғазаблантирмаслиги»ни қайд этган. Унинг таъкидлашича, Украина – ўт очишни тўхтатиш режимига риоя этилишини таъминлашга интилаётган бир нечта армияни сиғдира оладиган даражада катта давлатдир. Келлогнинг фикрича, қуролсизлантирилган ҳудудни назорат қилиш осон бўлади: «Қоидабузарликлар бўладими? Бўлиши мумкин, чунки улар доимо бор. Лекин буни кузатиш жуда осон».

The Times қайд этишича, Кит Келлогнинг режаси АҚШ «Россиянинг ҳозир эгаллаб турган ҳудуди устидан амалда назорати»ни тан олишини назарда тутади. Нашр билан суҳбатда Келлог РФ президенти Владимир Путин назорат зоналари ҳақидаги таклифни «қабул қилмаслиги мумкинлиги»ни тан олди.

The Times муаллифлари ўз нашрида Келлог режасини Украинанинг «парчаланиши» деб атаган, генералнинг ўзи эса ижтимоий тармоқдаги баёнотида буни рад этган. Келлог мақолада унинг сўзлари «бузиб кўрсатилгани»ни айтди:

Мен Украина суверенитетини қўллаб-қувватлаш учун ўт очишни тўхтатгандан кейин барқарорликни таъминлаш кучлари ҳақида гапирдим. Бўлиниш ҳақида гапирганда, мен иттифоқчи кучларнинг (Америка қўшинларисиз) ҳудудларини ёки жавобгарлик зоналарини назарда тутдим. Мен Украинанинг бўлинишини назарда тутмадим.

Россия Украина шарқдаги тўртта област – Донецк, Луҳанск, Херсон ва Запорижжядан қўшинларини олиб чиқиб кетишини ва НАТОга қўшилиш режаларидан воз кечишини талаб қилмоқда. Украина президенти Володимир Зеленский ҳудудий ён беришдан бош тортган.

АҚШ президентининг Яқин Шарқ бўйича махсус вакили Стив Уиткофф Доналд Трампга Украинада ўт очишни тўхтатишга эришишнинг энг тез йўли 2022 йилда аннексия қилинган Украинанинг тўртта ҳудуди устидан назоратни Россияга бериш эканини айтди. Уиткофф Вашингтонда Россия президенти махсус вакили Кирилл Дмитриев билан учрашганидан кейин шундай позицияни илгари сурди, деб хабар берди 11 апрел куни Reuters агентлиги манбаларга таяниб.

Кит Келлог Уиткофф билан сиртдан баҳслашди. Трамп билан учрашувда у Украина ушбу ҳудудлар билан боғлиқ баъзи шартларга рози бўлишга тайёрлиги, бироқ ҳеч қачон бир томонлама равишда уларни тўлиқ Россияга бермаслигини айтди, деб хабар берди Reuters’нинг икки манбаси.

Reuters’нинг қайд этишича, Трамп маъмуриятида Россия урушни тўхтатиш учун қўяётган шартлар бўйича келишмовчиликлар кучайиб бормоқда. Трампнинг Республикачилар партиясидаги баъзи сафдошлари фикрича, Стив Уиткофф бу масалада жуда россияпараст позицияни эгалламоқда. Март ойида эса NBC News телеканали Кейт Келлог «Украинага жуда яқинлиги» туфайли Россия талабига биноан тинчлик келишуви бўйича музокаралардан четлатилгани ҳақида хабар берганди.