Парижда Марин Ле Пенни қўллаб-қувватлаш намойиши бўлиб ўтди

Бир неча минг намойишчи Парижда "Миллий бирлашув" партияси парламент фракцияси раҳбари, Францияда Европа парламенти маблағларини талон-торож қилгани учун судланган Марин Ле Пен иштирокидаги митингга қўшилди. Намойишчилар ўта ўнг сиёсатчининг 2027 йилда бўлиб ўтадиган Франция президентлиги сайловларида иштирок этишини тақиқловчи суд қарорига қарши норозилик билдирган, деб хабар берди dpa 6 апрел, якшанба куни.

Акция «Миллий бирлашув» ташаббуси билан Ногиронлар саройи олдидаги майдонда бўлиб ўтди. Ташкилотчилар намойишда 10 минг киши иштирок этишини кутганди. Бино олдидаги майдон тўлиқ тўлгани йўқ, деб хабар берди dpa.

«30 йил давомида мен адолатсизликка қарши курашдим. Ва курашишда давом этаман», — дея Ле Пен сўзларини келтирган AP. Унинг маълумотларига кўра, акция қисман сайловолди митинги характерига эга эди. Оломон бир неча бор шундай ҳайқирган: «Марин — президент!» ва «Улар биздан 2027 йилни ўғирлай олмайди».

Ле Пеннинг бир қанча тарафдорлари «Адолат буйруқларни бажаряпти» ва «Суд диктатурасини тўхтатинг» деган плакатларни кўтариб юрган. Бошқа иштирокчилар Je suis Marine ("Мен - Марин") ёзувлари туширилган футболкаларни кийиб, Ле Пенни судланган ва шунга қарамай иккинчи марта мамлакатнинг энг юқори лавозимини эгаллашга муваффақ бўлган АҚШ президенти Доналд Трампга қиёслашди.