Россияга Покистондан мигрантлар олиб кириш учун тўғридан-тўғри рейслар йўлга қўйилади

«Биз бу борада музокаралар олиб боряпмиз. Бизда алоқалар бўлди. Биз уларнинг позициясини эшитдик ва Покистонга имкониятлар мавжудлиги ҳақида маълумот етказдик. Чунки аввал Москва ва Карачи ўртасида рейс бор эди. Шу боис, у ерда бу рейсларни қайта тиклашдан мамнун бўлишарди», — деди у. Шу билан бирга, йўловчи оқими ошса, бошқа йўналишлар ҳам эҳтимолдан холи эмас — барчаси уларнинг рентабеллигига боғлиқ бўлади, деб қўшимча қилди Жамоли.

Элчининг сўзларига кўра, шунингдек, Покистон Россиядан фуқаролари учун визалар режимини юмшатишини кутмоқда, «шунда кўпроқ одам кела олади». 2023 йил декабрида Россия ТИВ расмий вакили Мария Захарова Россия ҳукуматининг мазкур масалани фақат икки давлат ўртасидаги реадмиссия (депортация қилинган фуқароларни қайта қабул қилиш мажбурияти) бўйича ҳукуматлараро келишув имзолангандан сўнг кўриб чиқишга тайёрлигини билдирган эди.

Бундан олдин Россиядаги ишчи кучи танқислиги шароитида маҳаллий бизнес Покистон фуқароларини МДҲдан келадиган меҳнат мигрантларининг ўрнини босувчи сифатида кўриб чиқаётгани хабар қилинган. Уларни қишлоқ хўжалиги ва саноат корхоналарида ишга жалб қилиш режалаштирилган. Гап «малакали бўлмаган ишчилар — қадақловчилар, идиш тўпловчилар, ишлаб чиқариш линиялари операторлари» ҳақида кетмоқда, деб маълум қилган Ventra Industrial рекрутинг компанияси директори Олга Тонких.

Ўз навбатида, Свердловск области меҳнат ва бандлик департаменти директори Дмитрий Антонов ҳудуд Покистон, Ҳиндистон, Бангладеш ва Шри-Ланкадан электромонтажчи, металлург ва қурилишчиларни жалб этиш юзасидан музокаралар олиб бораётганини билдирган.

Москва ҳукумати ҳузуридаги миллатлар ишлари бўйича кенгашнинг миграция масалалари бўйича комиссияси раҳбари Юрий Московскийнинг таъкидлашича, Покистон фуқаролари «Алабуга» саноат кластерга аллақачон олиб келинаётган экан. БМТ маълумотларига кўра, Покистон дунёдаги энг йирик миграция мамлакатларидан бири ҳисобланади ва ўтган йили 1,6 миллион киши мамлакатни тарк этган.

Бунгача Россия Транспорт вазирлиги Покистон билан авиақатновларни тиклаш масаласида ушбу мамлакат жавобини кутаётганини маълум қилган эди. Шу билан бирга, вазирлик Россия рейсларининг иқтисодий жиҳатдан зарарсизлигини таъминлайдиган барқарор йўловчи оқими ҳали шаклланмаганини тан олди. Покистон Республикаси энергетика вазири Авайс Легарий эса мамлакатлар ўртасида тўғридан-тўғри рейслар 2025 йилда йўлга қўйилиши мумкинлигини айтган.

World Population Review маълумотларига кўра, хавфсизлик даражаси бўйича Покистон 139-ўринни эгаллайди. Республикадаги асосий муаммолардан бири — терактлардир. Америка таҳлил маркази Stratfor 2019 йилда Россия аҳолиси қисқараётгани, Покистон ва Афғонистонда эса аҳоли сони кескин ўсиб бораётганини ҳисобга олган ҳолда, Россия ушбу мамлакатлар фуқаролари учун тобора жозибадор бўлиб бориши мумкинлигини башорат қилган эди. Марказ таҳлилчилари фикрича, россияликларни Покистон ва Афғонистондан келган мигрантлар билан тўқнашувлар кутмоқда, чунки менталитетлар фарқи катта.