Сирдарёда Siemens иштирокида "яшил" логистика маркази ташкил этилиши мумкин

Сафар давомида Иляс Гюжлю Ўзбекистон ҳукумати ва ишбилармон доиралари вакиллари билан бир қатор учрашувлар ўтказди. Ташқи ишлар вазирлигида меҳнат миграцияси ва ўзбек мутахассисларини Германияда ишлашга тайёрлаш бўйича тил марказини ташкил этиш масалаларини муҳокама қилди.

Савдо-саноат палатаси раҳбарияти билан Франкфурт-Майн шаҳрида Ўзбекистон Савдо-саноат палатасининг ваколатхонасини очиш ва ўзбек маҳсулотларини Европа бозорига олиб чиқиш истиқболлари хусусида фикр алмашилди.

Stark Legal юридик фирмаси раҳбари Иляс Гюжлю Сирдарё вилоятига сафари чоғида вилоят ҳокими вазифасини бажарувчи Эркинжон Турдимов билан учрашув ўтказди.

Унда инвестициявий лойиҳалар, жумладан, Siemens компанияси иштирокида "яшил" логистика марказини ташкил этиш масалалари муҳокама қилинди. Лойиҳа ҳар қандай иқлим шароитида ишлайдиган қуруқ портни қуриш ва қайта тикланадиган энергия манбаларини жорий этишни ўз ичига олади.

Музокаралар давомида ҳамкорликни янада ривожлантириш ва тегишли меморандумларни ишлаб чиқиш бўйича келишувларга эришилди.