“Марҳамат, биз очиқмиз” – вазирлик юридик йўналишда лицензия ололмаётган олийгоҳлар билан мулоқотга тайёрлигини билдирди

26 март куни бўлиб ўтган матбуот анжуманида нодавлат ОТМлар юриспруденция йўналиши лицензиясини олишда қийинчиликка дуч келаётгани масаласи яна кўтарилди. Бу ҳақда Kun.uz мухбири хабар қиляпти.

Олий таълим, фан ва инновациялар вазири биринчи ўринбосари Шоҳрух Далиев бирор йўналишга берилмаяпти ёки сунъий тўсиқ қўйилган деган гап нотўғри эканини таъкидлади. “80-сон қарорда паспорт ва талаблар белгиланган. Лицензия ўшанга мувофиқ амалга оширилади. Юридик таълим йўналишини ташкил этишга келадиган бўлсак, Олий таълим вазирлигида ёндашув ҳар бир йўналишга объектив тарзда бир хил”, – деди у.

Шунингдек, Далиев вазирлик бирор йўналишга субъектив ёндашув қилиб, “юриспруденция бермаяпти, ё тиббиёт бермаяпти, математика бермаяпти деган нарсага қаттиқ чалиниш керак эмас”лигини ҳам айтди. “Порталимизга йўналиш қўшиш, янги олийгоҳ очиш масалаларида жуда кўп мурожаатлар келади ва биз барчасини тартиб-қоидага асосан кўриб чиқяпмиз. Битта ОТМ ёки битта йўналишга урғу бериб гапириш нотўғри. Агарда кимдадир айнан юриспруденция йўналишини очиш бўйича қандайдир муаммо юзага келаётган бўлса, марҳамат, биз очиқмиз. Биз билан мулоқот қилиши мумкин, алоҳида учрашишимиз ҳам мумкин”, – деди у.

Далиев фикрларини вазирлик департаменти бошлиғи Абдували Холиқов ҳам қўллаб-қувватлади. Унга кўра, хусусиятидан келиб чиққан ҳолда ҳамма йўналишнинг ўз талаби бор. “Масалан, юриспруденция деяпмиз, лекин биологиоя, геология йўналишларини очиш юриспруденциядан ҳам қийин. Чунки у қўшимча моддий техник база, лабораториялар талаб қилади. Юриспруденцияда ҳам лаборатория талаб қиладиган дастурлари бор”, – деди Холиқов.

Эслатиб ўтамиз, юриспруденция йўналишига лицензия олишдаги қийинчиликлар борлиги анчадан бери кўтариладиган масала. Масъуллар одатда нодавлат ОТМлар талабларни тўлиқ бажармаётгани, талаблар бажарилса, муаммо йўқлигини айтиб келишади.