Акром Имомўғли Туркия президентлигига номзод сифатида кўрсатилди

Туркиянинг мухолифатдаги Республика халқ партияси 23 март, якшанба куни ҳокимиятдан четлатилган ва қамоққа олинган Истанбул ҳокими Акром Имомўғлини президентликка номзод қилиб кўрсатди. Республика халқ партияси праймеризларида жами 15 миллион турк фуқароси қатнашди, бу эса мамлакатда рўйхатга олинган сайловчиларнинг деярли тўртдан бир қисмини ташкил этади. Улардан 13,2 миллиони ягона номзод бўлган Имомўғлини қўллаб-қувватлаган.

Республика халқ партияси раиси Ўзғур Ўзел Туркиянинг амалдаги президенти Ражаб Тоййиб Эрдўғанни муддатидан олдин президентлик сайловларини ўтказиш ва Акром Имомўғли билан рақобатлашишга қарор қилишга чақирди.

Шу куни ўн минглаб мухолифат тарафдорлари Истанбул мэрияси олдида тўпланиб, Эрдўғаннинг рақиби сиёсий сабабларга кўра таъқиб қилинаётганига норозилик билдиришди. AP Ўзелнинг митингдаги сўзларидан иқтибос келтирди: "Имомўғли бир томондан қамоқхонада, бошқа томондан эса президентликка йўл олди". Президентликка янги номзод бўлган Имомўғлининг рафиқаси Дилек Кая ҳам намойишчиларга мурожаат қилди.

Намойишчилар баррикадалар қуришга уриниб, полиция билан тўқнашди, деб ёзади Milliyet. Натижада, унинг маълумотларига кўра, 66 нафар намойишчи қўлга олинган, беш нафар полициячи жароҳатланган.

Европа давлатлари Истанбул мэри қўлга олинганини қоралаб чиқди

Германия ташқи ишлар вазири Бербок Акром Имомўғлининг қўлга олинишини «Туркиядаги демократияга жиддий зарба» деб атади. Париж ва Афина Истанбул мэрини қўллаб-қувватлади. Истанбулда юзлаб кишилар намойишга чиқди.

Истанбул мэри Акром Имомўғлининг қўлга олиниши ва йил бошидан бери амалдорлар, фаоллар, фуқаролик жамияти ва бизнес вакиллари ва журналистларнинг таъқиб қилиниши Туркиянинг ўзининг узоқ йиллик демократик анъаналарига содиқлиги ҳақида саволлар туғдирмоқда, деди Европа Иттифоқининг ташқи ишлар бўйича олий вакили Кая Каллас.

Брюссел Туркия ҳукуматини тўлиқ шаффофликни таъминлашга ва барча қонуний тартибларга риоя қилишга чақирди. Европа Иттифоқига номзод давлат ва Европа Кенгашининг узоқ йиллик аъзоси сифатида Туркия энг юқори демократик стандартларни қўллашга мажбур, дейилади баёнотда.