АҚШда минглаб федерал агентлар мигрантларга қарши курашга юборилди

Болаларга нисбатан зўравонлик, пул ювиш, гиёҳванд моддалар савдоси ва бошқа жиноятларга қарши курашиш билан шуғулланган АҚШ федерал агентликларининг минглаб ходимлари Трамп маъмуриятининг сиёсати туфайли ноқонуний мигрантларни излашга ва депортация қилишга мажбур бўлмоқда. Бу ҳақда Reuters хабар берди.

Ички хавфсизлик департаментининг собиқ ходими Тереза Кардинал-Браун сўзларига кўра, «иммиграцияни назорат қилишга йўналтирилаётган кучларнинг бунчалик кўплигини ҳеч қачон кўрмаган». Унинг таъкидлашича, мигрантларга қарши курашга устувор аҳамият берилиши ҳуқуқни муҳофаза қилиш органларининг асосий вазифаларини иккинчи ўринга туширган. Бош прокурор ўринбосари Тодд Бланш ҳуқуқ-тартибот идоралари ҳали ҳам «қолган жиноятлар тўлиқ қувват билан таъқиб қилинаётганини» таъкидлаб, буни рад этмоқда.

Ноқонуний мигрантларга қарши рейдларнинг фотосуратлари ва видеоларига қараганда, ҳатто илгари иммиграция сиёсатига унчалик алоқаси бўлмаган Алкогол, тамаки, ўқотар қуроллар ва портловчи моддалар бюроси ҳам жараёнда иштирок этмоқда. Reuters манбаларининг айтишича, Трамп инаугурациясидан бери 2,5 мингга яқин кишининг 80 фоизига иммиграция билан боғлиқ вазифаларни бажариш буюрилган. Улар, биринчи навбатда, АҚШда ноқонуний яшаётган мигрантларни таъқиб қилиш учун ишлатиляпти.

Трамп сайловолди ташвиқоти давомида бир неча бор ноқонуний мигрантларни оммавий депортация қилишга ваъда берган эди. У лавозимга келганидан бери ўн минглаб одамлар иммиграция қоидаларини бузганлик учун ҳибсга олинди, бунинг оқибатида вақтинчалик ҳибсхоналар гавжум бўлди, прокуратура ва судлар эса тегишли ишлар билан тўлиб-тошди.