The Telegraph: Макрон Украинага БМТ тинчликпарвар кучларини юбориш имкониятини ўрганмоқда

Франция президенти Эммануэл Макрон Украинадаги потенциал тинчлик келишувини назорат қилиш учун БМТ миссиясидан фойдаланиш имкониятини ўрганиб чиқмоқда, деб хабар беради Британиянинг The Telegraph газетаси.

Макрон тинчликпарвар кучларни юбориш мавзусини БМТ бош котиби Антониу Гутерриш билан 20 март куни ўтказилган Европа кенгаши саммитида муҳокама қилган.

Нашр маълумотларига кўра, Макрон Украинага Европа қўшинлари киритилишининг муқобил вариантларини «фаол ўрганиб чиқмоқда» — бу режани олдинроқ Франция президенти Буюк Британия бош вазири Кир Стармер билан биргаликда ишлаб чиққанди.

The Telegraph’нинг қайд этишича, БМТ тинчликпарвар кучлари юборилишини Хавфсизлик Кенгаши маъқуллаши керак, аммо Россия ва эҳтимол, АҚШ бу таклифга қарши чиқиши мумкин.

Эммануэл Макрон ва Кир Стармер Украинада тинчликни ўрнатишга уринаётган НАТО ва Европа Иттифоқи давлатлари гуруҳи — «Тайёрлар коалицияси»га бошчилик қилмоқда. Ушбу гуруҳ Украинага Европа қўшинларини юбориш режасини ишлаб чиққан, аммо ҳозирча нечта давлат ўз ҳарбийларини юбориши ва уларнинг вазифаси нимадан иборат бўлиши аниқ эмас. Ўз навбатида Буюк Британия Украина ҳаво маконини ҳимоя қилиш учун қирувчи самолётлар юбориши мумкинлигини билдирган.

Россия вакиллари Украинада ҳар қандай НАТО қўшинларининг иштирокини «қабул қилиб бўлмаслигини» билдирган. Эммануэл Макрон эса фақат Украина, Россия эмас, ўз ҳудудини ким ҳимоя қилишини ҳал қилиши мумкинлигини таъкидлаган.