Қўшимча функционаллар
-
Тунги кўриниш
Reuters: Разведка Трампга Курск областидаги украиналик ҳарбийлар қуршовда эмаслигини маълум қилган
Шунга қарамай, АҚШ президенти Курск областидаги УҚК аскарлари россиялик ҳарбийлар томонидан қуршовга олинганини таъкидлаб келмоқда.
Фото: Reuters
Американинг разведка агентликлари, жумладан, Марказий разведка бошқармаси Оқ уйга Украина ҳарбийлари сўнгги кунларда Курск областида орқага чекингани, бироқ қуршовга олинмагани ҳақида маълумот берган. Аммо АҚШ президенти Доналд Трамп бу борада ўз фикрида қатъий туриб олган, деб хабар беради Reuters.
Қайд этилишича, Украина Қуролли кучларининг Курск областидаги ҳолатига оид разведка маълумотлари Оқ уйга ўтган ҳафта юборилган.
14 март куни Трамп «минглаб украин аскарлари» Россия ҳарбийлари қуршовида ва жуда ёмон ҳолатда эканини маълум қилганди. У Россия президенти Владимир Путинни «уларга раҳм қилиш»га чақирди. Ўз навбатида Путин Трампнинг илтимосини бажаришга тайёрлигини маълум қилди.
Орадан кўп ўтмай Украина Қуролли кучлари Бош штаби Курск областидаги украиналик ҳарбийлар «қуршовда экани» тўғрисидаги хабарлар ҳақиқатга тўғри келмаслигини маълум қилди.
Аммо 19 март куни Трамп Fox News’га берган интервюсида Курск областидаги УҚК Россия қўшинлари томонидан қуршаб олинганини такрорлади. «Россияда устунлик бор. Биласизки, улар 2,5 мингга яқин украиналик аскарни қуршовга олди. Улар жиддий қуршаб олинган ва бу яхши эмас», — деди Трамп.
