“Ўзига ишонган аёлларга алоҳида ҳурмат билан қарайман” — Саида Мирзиёева

“Қийинчиликларга қарамай, ўз ишини бошлаётган, ўзига ишонган ва олға интилаётган аёлларга доимо алоҳида ҳурмат билан қарайман. Уларнинг қатъияти ва муваффақият сари илдам ҳаракати оилани ҳам, жамиятни ҳам, мамлакатни ҳам олдинга силжитадиган кучдир”, — дейди Мирзиёева.

Президент ёрдамчиси ўз бизнесини ривожлантиришга интилаётган хотин-қизлар учун яратилган Ҳамроҳ президент дастурини алоҳида тилга олди.

Ушбу дастур доирасида ҳар бир аёл зарур билимларни олиши, мураббийлар кўмаги ҳамда имтиёзли кредитлар ва грантлардан фойдаланиши мумкин.

“Ишончим комилки, ҳар бир муваффақият тарихи Ўзбекистон тараққиётига қўшилган ҳиссадир. Бундай воқеалар кун сайин кўпайиб бормоқда”, — деб таъкидлаган Мирзиёева.

Эслатиб ўтамиз, Ҳамроҳ дастури доирасида 2025 йил 1 майдан қуйидагиларни амалга ошириш белгиланган:

·        хотин-қизларга “яшил лойиҳалар” ва IT соҳасидаги лойиҳаларни амалга оширишга, шунингдек, камида 5 нафар хотин-қизнинг тадбиркорлигини йўлга қўйишга кўмаклашган 1 минг нафар “устоз” тадбиркорларга 50 миллион сўмгача грант ажратиш;

·        ижобий кредит тарихига эга бўлган хотин-қизларга 100 млн сўмгача гаровсиз кредит ажратиш;

·        аёл тадбиркорлар томонидан кредит ҳисобидан сотиб олинаётган асбоб-ускуналар етказиб берилгунга қадар “Тадбиркорликни ривожлантириш компанияси” АЖ томонидан кафиллик тақдим этилишини йўлга қўйиш.