Мисрда 3600 йил аввал ҳукмронлик қилган сирли фиръавннинг қабри топилди

Мисрда илгари номаълум бўлган фиръавннинг қабри топилди. У 3600 йил олдин, минтақада сиёсий беқарорлик ҳукм сурган даврда ҳукмронлик қилган, деб ёзади Independent.

Дахма 7 метр чуқурликда, Қадимги Миср шаҳарларидан бири — Абидосдаги Анубис тоғи қабристонида жойлашган. Ушбу ҳудуд тахминан милоддан аввалги 1700 йилдан 1600 йилга қадар Юқори Мисрни бошқарган Абидослар сулоласи даврига тегишли.

Дафн қилиш жойига олиб борувчи хона деворларига Исида ва Нефтида маъбудаларининг тасвирлари туширилган. Шунингдек, қачонлардир ҳукмдорнинг исми ёзилган чизиқлар сақланиб қолган. Қабрдан топилган безаклар ва матнлар тахминан милоддан аввалги 1650–1550 йилларда яшаган фиръавн Сенебкай мақбарасидаги санъат асарларини эслатади.

Топилган мақбара Абидос сулоласи даврига оид бошқа қабрлардан анча каттароқ бўлиб чиққан (таққослаш учун аниқ ўлчамлар келтирилмаган). Тахминларга кўра, номаълум фиръавн Сенебкай ҳокимият тепасига келишидан аввал ҳукмронлик қилган.

Мазкур қабр феврал ойида эълон қилинган машҳур топилмадан кўп ўтмай аниқланмоқда: шотландиялик археолог Пирс Литерланд Тутмос II нинг иккита қабрини топганини маълум қилганди.