NASA астронавтлари ХКСда 9 ой қолиб кетганидан кейин Ерга қайтди

Халқаро космик станция (ХКС)да коинотда тўққиз ойдан кўпроқ вақт ўтказган NASA астронавтлари Барри «Бутч» Уилмор ва Суни Уилямс ХКСдан 17 соатлик парвоздан сўнг SpaceX'нинг Crew Dragon капсуласида 18 март, сешанба куни кечқурун Ерга қайтишди. Капсуланинг атмосферадан ўтиши, унинг парашютларининг очилиши ва Американинг Флорида штати қирғоқларига юмшоқ қўниши ҳақидаги жонли эфир Американинг бир қатор каналлари томонидан трансляция қилинган ва АҚШ президенти Доналд Трамп томонидан ҳам Truth Social ижтимоий тармоғида эълон қилинган.

Америкалик астронавт Ник Хейг ва россиялик космонавт Александр Горбуновларни ҳам ўз ичига олган Crew-9 миссияси экипажи тиббий кўрикдан ўтиш учун NASA'нинг Хюстондаги космик марказига етказилади. Горбунов ва Хейг космосда 171 кун, Уилямс ва Уилмор эса 286 кун бўлишди.

Миссия сиёсий эътибордан четда қолмади: Трамп бир неча бор астронавтларни тезроқ қайтишга чақирган ва АҚШнинг собиқ президенти Жо Байден уларни сиёсий сабабларга кўра ХКСга «ташлаб кетганини» даъво қилган.

SpaceX Crew Dragon'нинг ХКСга стартини сўнгги дақиқада кечиктирганди

Америкалик миллиардер Илон Маскнинг SpaceX компанияси Crew Dragon бошқариладиган космик кемасининг Халқаро космик станция (ХКС)га парвозини стартдан бир соатдан камроқ вақт олдин қолдирди. 12 март кечки пайтга режалаштирилган парвоз ерусти комплексининг гидравлик тизимидаги муаммо туфайли бекор қилинганди.

Crew Dragon экипажи таркибида россиялик космонавт Кирилл Песков, NASA астронавтлари Энн МакКлейн ва Никол Айерс ҳамда JAXA астронавти Такуя Ониши бор. Бу жамоа ХКСдаги олдингисининг ўрнини эгаллаши керак.

Crew Dragon космик кемасига эга Falcon-9 ракетаси NASA'нинг Флорида штати Кеннеди коинот марказидаги 39А ракета майдонидан парвоз қилиши керак эди. ХКС Америка сегментининг Harmony модулига уланиш 13 март куни соат 13:00 га режалаштирилган эди. Парвозни бекор қилиш тўғрисида қарор қабул қилинганда экипаж бортда бўлган.