Путин Украина Қуролли кучлари ҳужумидан бери биринчи марта Курск областига борди

Россия президенти Владимир Путин Украина Қуролли кучлари минтақада операцияси бошлаганидан бери биринчи марта Курск областига борди, деб хабар беради ТАСС.

Кремлнинг маълум қилишича, Путин 12 март куни Курск қўшинлари гуруҳи қўмондонлик пунктларидан бирида йиғилиш ўтказган. У қаерда жойлашганига аниқлик киритилмаган.

Россия давлат агентлиги камуфляж кийиб олган РФ президенти Россия Бош штаби бошлиғи Валерий Герасимовнинг ҳисоботини тинглаган видеони эълон қилди. Йиғилишда олинган кадрлар «Россия-24» телеканали орқали эфирга ҳам узатилган.

Йиғилиш давомида Герасимов россиялик ҳарбийлар Курск областидаги юришлари давомида минг километр квадратдан ортиқ майдонни эгаллаганини маълум қилди. Хусусан, охирги беш кунда минтақадаги 24 та аҳоли пункти озод этилган. Бундан ташқари, россиялик ҳарбийлар чегаранинг алоҳида ҳудудларида Суми областига ҳам кириб борган.

Герасимовнинг сўзларига кўра, Курск областидаги Украина Қуролли кучлари «изоляция қилинган» ва уларни «режали йўқ қилиш ишлари давом этмоқда». РФ Бош штаби бошлиғининг маълум қилишича, украин армияси минтақада 67 мингдан ортиқ ҳарбий хизматчисидан айрилган.

Бунга жавобан Путин «қисқа муддатда душманни яксон қилиш ва Курск областининг бутун ҳудудини озод этиш вазифасини қўйган». Унинг сўзларига кўра, келажакда Курск области давлат чегарасида хавфсизлик зонасини яратиш ҳақида ўйлаб кўриш керак бўлади.

РФ президенти Курск областида асирга тушган барча украиналик ҳарбийларга «террорчи сифатида» муносабатда бўлиш кераклигини таъкидлади.

«Ҳозиргина Валерий Василевич [Герасимов] асирга олингаларни эслаб ўтди. Биз биринчи навбатда, Россия қонунларидан келиб чиқиб, бу инсонларга террорчи сифатида муносабатда бўлишимиз керак. Биз барча одамларга инсоний муносабатдамиз ва келажакда ҳам шундай бўлиши лозим. Бизнинг қўлимизга тушиб қолган барчага нисбатан. Шу билан бирга, ҳам эслатиб ўтмоқчиманки, чет эллик ёлланма аскарлар ҳарбий асирлар билан муомала қилиш тўғрисидаги 1949 йилги Женева конвенциясига кирмайди», — дейди Путин.

УҚК 2024 йил август ойида уюштирган ҳужуми натижасида Курск областининг қатор аҳоли пунктларини эгаллаб олганди. АҚШ Украинага разведка маълумотларини беришни тўхтатгач, март ойида РФ қўшинлари ушбу аҳоли пунктиларининг баъзиларини қайтариб олди. 

Эслатиб ўтамиз, 12 март куни эрталаб Россиядаги урушни ёқловчи телеграм-каналларда Суджа марказида Россия байроғини ўрнатаётган ҳарбийлар акс этган видеолар тарқалди. Conflict Intelligence Team суриштирув лойиҳаси асосчиси Руслан Левиев ҳам «амалда ҳозирнинг ўзидаёқ бутун Суджа шаҳри Россия қўшинлари назоратига ўтди, дейиш мумкинлиги»ни айтиб, Украина қуролли кучлари бўлинмалари ўз позицияларини уюшган тарзда тарк этаётгани ва руслар ҳудудларни деярли жангсиз қайтариб олаётганини таъкидлади.