Германия «Роснефт» шуъба корхонаси устидан ишончли бошқарувни узайтирди

Германия ҳукумати «Роснефт» шуъба корхонаси Rosneft Deutschland'ни ишончли бошқариш муддатини 2025 йил 10 сентябргача узайтирди. Бу ҳақда 6 март, пайшанба куни Германия иқтисодий ишлар ва иқлимни муҳофаза қилиш вазирлиги маълум қилди.

«Қарорнинг амал қилиш муддати узайтирилиши билан Федерал тармоқ агентлиги (Bundesnetzagentur) Rosneft Deutschland ҳамда PCK Schwedt, Miro (Карлсруэда) ва Bayernoil (Фобург-Дунайда) учта нефтни қайта ишлаш заводларидаги тегишли улушларни назорат қилади», — дейилади AFP хабарида.

«Таъминот хавфсизлигини таъминлаш федерал ҳукумат учун асосий масала бўлиб қолмоқда», — деди иқтисодиёт вазирининг парламент статс-котиби Михаэл Келнер.

Узайтириш учта нефтни қайта ишлаш заводида ишлаб чиқаришни давом эттириш ва иш билан таъминлаш имконини беради.

«Россия томони сотув бўйича музокараларни якунлаши керак»

Келнер Россия давлат компанияси "Роснефт" яқин орада Rosneft Deutschland'ни сотишини кутмоқда, деб хабар берди AFP. Германиядаги шуъба корхона Шведтдаги PCK Raffinerie нефтни қайта ишлаш заводининг назорат пакетига эга.

«Биз Россия томони сотиш бўйича музокараларни имкон қадар тезроқ якунлашини кутмоқдамиз; мулкчилик тузилишига оид аниқлик нефтни қайта ишлаш заводларини янада ривожлантириш учун муҳим», — дея таъкидлади Келнер.

Rosneft Deutschland ҳиссасига 2024 йил сентябр ҳолатига кўра Германия нефтни қайта ишлаш қувватининг қарийб 12 фоизи тўғри келади ва бу уни ушбу соҳадаги энг йирик компаниялардан бирига айлантирди.