Киевга босим ўтказиш учун: Трамп Украинага қурол юборишни тўхтатиб қўйди

Украина президенти Володимир Зеленский Оқ уйда АҚШ президенти Доналд Трамп билан жанжаллашгани «ўз самарасини бера бошлади». Трампнинг буйруғи билан Украинага қурол юбориш тўхтатилди. Америка нашрларига кўра, Байден маъмурияти даврида ажратилган қуролларни юбориш тўлиқ эмас, Трампнинг кейинги буйруғига қадар тўхтатилган.

Табиийки, Доналд Трамп Киевга босим ўтказиш учун шундай қарорга келган. АҚШ президенти Оқ уйдаги жанжалдан кейин Зеленский тинчлик истамаётгани, бунақада келишиб бўлмаслигини кўп марта такрорлади. Афтидан, сиёсий босим ёрдам бермагач, Трамп маъмурияти ҳарбий босим йўлига ўтди.

«Президент Трамп тинчлик томон интилаётганини аниқ айтиб бўлди. Ҳамкорларимиз ҳам бу жараёнга жалб қилиниши керак. Биз ҳарбий ёрдамни тўхтатиб, у муаммони ҳал қилишга қанчалик ёрдам беришини қайта кўриб чиқамиз», дейилади AFP келтирган Оқ уй баёнотида.

Fox News ёзишича, бу тўхталиш «Украина тинчлик томон интилаётганини кўрсатгунига қадар» давом этади. Трампнинг буйруғи Украинага юборилиши кўзда тутилган, Украина учун ишлаб чиқарилаётган, ҳали йўлда бўлган ва Киевга юбориш учун Полшада сақланаётган барча қуролларга тегишли.

Трамп президентликка киришиши билан АҚШнинг барча ташқи ёрдам дастурларини музлатиб қўйганди. Wall Street Journal бир неча кун аввал АҚШ давлат котиби Марко Рубио Украинага ушбу чекловни истисно қилган ҳолатда ҳарбий ёрдам юбориш тўғрисида буйруқ чиқаргани ҳақида ёзганди. Давлат департаменти мулозими Питер Марокко буйруқни Пентагонга етказмагани учун Украинага юборилиши керак бўлган қуроллар навбатдаги партияси АҚШда қолиб кетган. Умуман, Трамп президентликка келганидан кейин Украинага жуда оз миқдорда қуроллар етказиб берилган.

Бироқ АҚШ ҳарбийлари Украинага разведка маълумотлари етказиб беришни тўхтатмаган. Трамп ҳарбий ёрдамни тўхтатишга буйруқ берганидан кейин ҳам.

Кремл ҳолатга муносабат билдирди: «Ҳали аниқлаштириб олиш керак. Лекин бу рост бўлса, чиндан Киев режимини тинчлик келишувига ундаши мумкин», деган Песков.

Ҳозирча Вашингтон ва Киев ҳолатга расмий муносабат билдиргани йўқ. Ҳарбий экспертлар АҚШ Украинага Patriot ҳаво ҳужумидан мудофаа тизимлари учун ўқ-дорилар етказиб бермаса, Украина ўз осмонини ҳимоя қила олмаслигини айтмоқда. Бугун Киев марказида АҚШ ҳарбий ёрдамни тўхтатгани маълум бўлгач украиналиклар турли байроқларни кўтариб акция ўтказишган. Ҳозирча бу акция тафсилотлари ҳам маълум эмас.

Ўткир Жалолхонов тайёрлади.
Тасвирчи ва монтаж устаси – Жаҳонгир Алибоев.