CNN: Трамп жамоаси Зеленский билан яширин музокаралар ўтказди

Доналд Трамп маъмурияти амалдорлари Овал кабинетдаги тортишувдан кейин «Оқ уй билан муносабатлар барқарорлашуви муҳимлигини таъкидлаш учун» Украина президенти Володимир Зеленский ва унинг жамоаси билан яширин музокаралар ўтказди. Бу ҳақда CNN ўзининг икки манбасига таяниб хабар берди.

Маълумотларга кўра, музокарада иштирок этганлар орасида Трампнинг Украина бўйича махсус вакили Кит Келлог ҳам бор. Трамп маъмурияти вакиллари украиналикларни нодир металлар бўйича битимни «иложи борича тезроқ» — АҚШ президенти конгрессда чиқиш қилгунига қадар қайта тиклашга чақирган.

The Times’нинг ўз манбаларига таяниб ёзишича, Украина президентини кўндиришга Буюк Британия бош вазири Кир Стармер ҳам ёрдам берган. Нашр суҳбатдошларининг маълумотларига кўра, 4 март куни Стармер Зеленский билан телефон орқали мулоқот қилган. Мулоқот давомида у Зеленскийга «Трамп эшитишни истаётган баъзи нарсалар борлигини», жумладан, Зеленский Овал кабинетдаги учрашувни нотўғри ўтказганини тан олишини хоҳлаётганини етказган.

Шундан кейин Зеленский Оқ уйдаги учрашув «кутилганидек ўтмагани» айтилган постни ёзди ва афсусда эканини билдирди. «Бундай бўлганидан афсусдаман. Барчасини тўғирлаш вақти келди. Келгуси ҳамкорлик ва мулоқот конструктив бўлишини истаймиз», — деб ёзган Зеленский.

Нодир металлар тўғрисидаги битим 28 феврал куни имзоланиши керак эди, аммо Зеленскийнинг Вашингтонга ташрифи вақтида Трамп ва вице-президент Жей Ди Вэнс ўртасида тортишув юз берди. Шундан кейин Зеленский Оқ уйни муддатидан олдин тарк этди.

Бир неча кундан кейин Трамп Украина билан нодир металлар бўйича битим «ўлмагани», аммо Володимир Зеленский Америка Украинага берган барча нарсага «миннатдор» бўлиши кераклиги ҳақида гапирди.

4 март куни Reuters ўз манбаларига таяниб, АҚШ ва Украина битимни имзолашга тайёрланаётганини, Трамп бу ҳақда конгрессга мурожаатида маълум қилмоқчи экани ҳақида ёзди. Аммо Трамп 5 март куни ўтказилган чиқиши давомида битимни имзолашга тайёрлиги ҳақида гапирмади.