Зеленский: Биз тинчликни хоҳлаймиз, лекин хавфсизлик кафолати керак

28 феврал, жума куни кечқурун Оқ уй раҳбари Доналд Трамп билан муваффақиятсиз музокаралардан кўп ўтмай, Украина президенти Володимир Зеленский Американинг Fox News телеканалига интервю берди. Журналист билан суҳбат чоғида у Қўшма Штатлар билан шериклик муносабатларини сақлаб қолишни исташини ва табиий ресурслар бўйича шартнома имзолашга тайёрлигини, бироқ бу Украина учун хавфсизлик кафолатлари йўлидаги биринчи қадам бўлиши кераклигига ишончи комил эканлигини айтди.

Володимир Зеленский: «Биз жанг қилишни хоҳлаб турганимиз йўқ»

«Уруш тугашини украиналиклардан кўпроқ ҳеч ким хоҳламаяпти», деди Зеленский. Бироқ, дея давом этди у, Украина халқи адолатли ва мустаҳкам тинчликни истайди, бу эса Қўшма Штатлар хавфсизлик кафолатларисиз мумкин эмас. У бўлмаса украиналиклар «Путин эртага қайтиб келади» деб қўрқишади, чунки Россия президенти келишувларни бир неча марта бузган, дея таъкидлади Украина раҳбари.

Зеленский Трамп билан можароси «ҳар икки томон учун ҳам ёмон» эканини айтди, бироқ у ўзини «ёмон иш қилган» деб ўйламаяпти ва кечирим сўраши керак эмас. Музокараларни давом эттириш учун ҳозир Оқ уйга қайтишга тайёрми, деган саволга Украина президенти: «Йўқ», деб жавоб берди.

Студиядаги мулоқот чоғида Доналд Трампнинг Оқ уйдаги учрашувдан сўнг Зеленский ҳақида айтган: «У жанг қилишда, курашишда давом этишни хоҳлайди» деган баёноти акс этган видео намойиш этилди.

«Биз жанг қилишни хоҳлаб турганимиз йўқ», — дея изоҳ берди Украина президенти видеога. «Мен ўз фуқароларимизни, аскарларимизни ҳурмат қиламан. Шунинг учун Украина қачон ва қандай кафолатлар олиши ҳақида аниқ маълумотга эга бўлмасам, қайтиб келолмайман».