NBC: АҚШ Украинанинг энергетика тизимини молиялаштиришни тўхтатди

АҚШ Давлат департаменти бир неча кун аввал АҚШ Халқаро тараққиёт агентлиги (USAID)нинг Россия томонидан ўққа тутилганидан сўнг Украина электр тармоғини тиклаш учун юзлаб миллион доллар ажратган дастурини тўхтатди. Бу ҳақда 28 феврал, жума куни NBC News агентликнинг Украинадаги миссиясида ишлаётган USAID икки ходимига таяниб хабар берди.

Уларнинг сўзларига кўра, агентлик Украинадаги иштирокини ҳам сезиларли даражада қисқартирмоқда: агар илгари ушбу мамлакатдаги USAID миссиясида 64 киши ишлаган бўлса, ўзгаришлардан кейин фақат саккиз нафар ходим қолади.

Телеканал манбаларидан бири қабул қилинган қарорлар АҚШ президенти Доналд Трамп маъмуриятининг урушни тугатиш бўйича музокаралар олиб бориш қобилиятига «сезиларли путур етказади» ва «Россияга Америка Украина ва унинг ўтмишдаги сармоялари ҳақида қайғурмаслигига ишора бўлади», деган фикрни билдирди.

USAID'даги катта қисқартиришлар

60 йилдан ортиқ вақт давомида АҚШ Халқаро тараққиёт агентлиги инсонпарварлик ёрдами бўйича дунёда биринчи ўринда турган. Аммо ҳозир Трамп маъмурияти USAID'ни Америка солиқ тўловчиларининг маблағларини сарфлашда исрофгарчиликка йўл қўйиш, шунингдек, «Ал-Қоида» ва Афғонистонда гиёҳванд моддалар етиштириш билан боғлиқ лойиҳаларни молиялаштиришда айбламоқда.

26 феврал куни АҚШ Давлат департаменти умумий қиймати тахминан 54 миллиард долларга тенг 5800 та узоқ муддатли агентлик шартномаларини 92 фоизга қисқартиришини эълон қилди. Аввалроқ USAID'нинг ходимлари сони 34 баробарга — 10 мингдан 290 нафарга қисқартирилиши режалаштирилгани хабар қилинганди. Феврал ойи бошида хориждаги агентлик ходимларига АҚШга қайтишлари учун 30 кун муҳлат берилди.

USAID ишчилари касаба уюшмалари Оқ уйни судга бериб, агентликни фақат Конгресс тарқатиб юбориши мумкинлиги ва Трамп маъмуриятининг ҳаракатлари конституцияга зид ҳамда ноқонуний эканлигини таъкидлади. 8 феврал куни Вашингтондаги суд уларнинг даъвосини қаноатлантиргани ва ишдан бўшатилган 2700 га яқин USAID ходимини ишга қайтаргани, аммо музлатиб қўйилган грантларни тиклашдан бош тортгани маълум бўлди.