Узун туман ИИБда фуқаро вафот этиши билан боғлиқ ҳолатни прокуратура ва Омбудсман ўрганмоқда

Kun.uz 27 февраль куни Узундаги қотиллик иши доирасида сўроққа олиб кетилган фермер вафот этгани, унинг танасида қийноқ излари борлиги ҳақида суриштирув эълон қилган эди.

Бош прокуратура матбуот котиби Ҳаёт Шамсутдиновнинг Kun.uz'га маълум қилишича, ҳолат юзасидан терговга қадар текшириш ҳаракатлари олиб борилмоқда.

Шунингдек, ушбу ҳолатни Ўзбекистон Олий Мажлисининг Инсон ҳуқуқлари бўйича вакили – Омбудсманнинг ҳудудий вакиллари ҳам ўрганмоқда, якунлари бўйича расмий маълумот берилади. Бу ҳақда Омбудсман матбуот котиби Фотима Мадраҳимова Kun.uz'га маълум қилди.

Суриштирувда марҳум фуқарога ўлимидан бир неча соат олдин «навбатчи» модда билан 6 сутка маъмурий қамоқ қўллангани, суд қарорида чалкашликлар борлиги маълум қилинган эди. Судьялар олий кенгаши ушбу ҳолатда қарор чиқарган тергов судьяси Аъзамберди Алиқуловга нисбатан хизмат текшируви тайинланганини маълум қилди.

«…Т. Ҳ.га (марҳум) оид маъмурий ҳуқуқбузарликка доир иш кўриб чиқилишида Судьялар одоби кодекси қоидалари бузилгани эҳтимолидан келиб чиқиб, Сурхондарё вилояти жиноят ишлари бўйича Узун туман судининг тергов судьяси А. Алиқуловга нисбатан хизмат текшируви тайинланди», — дейилади Судьялар олий кенгаши баёнотида.

Маълумот учун, 15 февраль куни Сурхондарёда бир оиланинг уч аъзоси ўлдириб кетилган қотиллик жинояти содир қилинди. Шундан сўнг тергов жараёнида шу ҳудуддаги кўплаб эркаклар сўроқ учун Узун тумани ИИБ биносига олиб борилган. Шулар қаторида 50 ёшли фермер Тоҳир Ҳайитов ҳам ходимлар томонидан олиб кетилиб, ИИБ биносида 2 кун сақланган ва 25 феврал куни «юрак хуружидан» вафот этган. Марҳумнинг яқинлари Kun.uz'га танада қийноқ излари борлигини, жиноятни унинг бўйнига қўймоқчи бўлган бўлишлари мумкинлигини айтган эди.