Ҳафта охирида ёғингарчилик бўлиши кутилмоқда

Ўзбекистоннинг катта қисмида дам олиш кунлари ҳаво ҳарорати 2–3 даражага кўтарилишига қарамай, ҳали ҳам меъёрий қийматлардан паст бўлади, дея хабар бермоқда «Ўзгидромет» агентлиги.

Жума куни Ўзбекистон ҳудуди бўйича нисбатан совуқ об-ҳаво сақланиб туради. Қорақалпоғистон Республикаси, Хоразм вилоятида баъзи жойларда қор ёғади, Бухоро, Навоий вилоятларида бироз ёғингарчилик (ёмғир, қор) бўлиши мумкин. Республиканинг қолган ҳудудларида ёғингарчиликсиз об-ҳаво бўлиши кутилмоқда.

1 март, шанба куни республика ҳудудининг катта қисмида ёғингарчилик кутилмайди, фақат Қорақалпоғистон Республикаси ва Хоразм вилоятида баъзан ёмғир, қор ёғади.

Якшанба куни республиканинг аксарият вилоятларида (Фарғона водийсидан ташқари) ёғингарчилик бўлади. Марказий вилоятларда ва республика жанубида куннинг иккинчи ярмида ёғингарчилик бўлиши кутилмоқда.

Республиканинг шимоли-ғарбий ва чўл ҳудудларида яна совуқ ҳаво кириб келиши ҳисобига ҳаво ҳарорати аста-секин пасаяди ва Қорақалпоғистон Республикаси, Хоразм вилоятида якшанба куни кечаси –7…–12 даражани, кундузи –3…+2 даражани, Бухоро, Навоий вилоятларида кечаси –2…+3 даражани, кундузи 0…+5 даражани ташкил этади.

Республиканинг айрим жойларига туман тушиши мумкин. Шамол 7–12 метр/сония тезликда эсади, 28 феврал ва 2 март кунлари баъзи жойларда 15–20 метр/сониягача кучаяди.

Тошкент шаҳрида 28 феврал ва 2 мартда асосан қуруқ об-ҳаво кузатилади, фақат якшанба куни кечқурун ёғингарчилик бўлиши мумкин, шамол тезлиги 10–12 метр/сониягача кучаяди. Ҳарорат 28 февралда +6…+8 даража, 1–2 март кунлари +8…+10 даража бўлади. Ҳарорат асосан кечалари –1…+2 даража бўлади.