«Унинг қатнашиши жуда муҳим эмас» — Трамп Зеленскийнинг урушни тўхтатишга оид музокаралардаги иштироки ҳақида

АҚШ президенти Доналд Трамп Россия—Украина урушини тўхтатиш музокараларида Володимир Зеленский иштирок этиши шарт эмаслигини маълум қилди. Бу ҳақда у Fox News Radio’га берган интервюсида таъкидлади.

Трампнинг сўзларига кўра, Украина президенти сўнгги уч йилда «учрашувларда бўлган» ва ҳамон можарога барҳам бера олмаган.

«Тўғрисини айтсам, учрашувларда унинг қатнашиши жуда муҳим эмас. Зеленский уни Саудия Арабистонидаги учрашувга таклиф этишмаганини айтганди… Бу устувор бўлмаганини назарда тутмоқдаман, чунки у шу пайтгача музокараларни ёмон олиб борди», — дейди Трамп.

Шунингдек, унинг айтишича, АҚШнинг олдинги президенти Жо Байден ва Зеленский урушнинг олдини олишлари мумкин эди.

«Ҳар сафар «Бу Россиянинг айби эмас», десам мени фейк янгиликлар учун танқид қилишади, аммо шуни айтаманки, Байден нотўғри нарсаларни гапирди, Зеленский нотўғри нарсалар ҳақида гапириб келди, уларга анча кучли ва каттароқ томон ҳужум қилди. Бироқ Россияни бундан осонликча қайтариш мумкин эди», — дейди Трамп.

АР-Риёдда ўтказилган Россия—Америка музокараларидан кейин Доналд Трамп Зеленскийни кескин танқид қилмоқда. АҚШ президентининг маълум қилишича, украиналиклар орасида Зеленскийнинг рейтинги пасайиб кетган, шунингдек, Трамп уни «диктатор» деб атади ва Украинада президентлик сайловларини ўтказишга чақирди.

Politico’нинг ёзишича, АҚШ президенти Доналд Трампнинг Украина президенти Володимир Зеленскийга нисбатан очиқчасига кескин фикр билдириши Вашингтон Россия томон бурилиши билан боғлиқ эмас, балки конлар бўйича келишув тузиш учун Киевга босим ўтказиш усулидир.