Торонтода қўниш вақтида ағдарилиб кетган самолёт йўловчиларига 30 минг доллардан пул таклиф қилинди

Delta Airlines авиакомпанияси вакилининг маълум қилишича, молиявий таклиф «ҳеч қандай шартлар билан боғланмаган». Бу йўловчилар олдингидек авиакомпанияни судга беришлари мумкинлигини англатади.

Фото: AP

Торонтода қўниш вақтида ағдарилиб кетган Delta Airlines авиакомпанияси самолёти йўловчиларига 30 минг доллардан компенсация таклиф қилинди, деб хабар беради Euronews.

18 феврал куни Bombardier CRJ 900 самолёти ноқулай об-ҳаво шароитида Торонто аэропортига қўниш вақтида ағдарилиб кетган ва унда ёнғин чиққан эди. Шунга қарамай, рейсда бўлган 76 нафар йўловчи ҳамда тўрт нафар экипаж аъзоларининг барчаси омон қолган ва уларнинг ҳаммасига компенсация таклиф қилинган. Шу билан бирга, Delta Airlines вакилининг маълум қилишича, молиявий таклиф «ҳеч қандай шартлар билан боғланмаган». Бу йўловчилар олдингидек авиакомпанияни судга беришлари мумкинлигини англатади.

Агар йўловчиларнинг барчаси товон пулини олишга рози бўлса, авиакомпания қарийб 2,3 миллион доллар тўлашга мажбур бўлади.

Авиафалокат оқибатида 21 нафар йўловчи жароҳат олганди. Уларнинг барчаси маҳаллий шифохоналарга етказилган ва 20 нафарига аллақачон жавоб берилган.

Ҳодиса тасвирланган видеодан кўриш мумкинки, самолёт шу қадар қаттиқ қўнишни амалга оширганки, унинг ўнг қаноти ва думи узилиб кетган. Шундан сўнг ёнғин бошланиб, ҳаво кемаси учиш-қўниш йўлагида ағдарилиб кетган.

Ҳозирча ҳалокат сабаблари аниқ эмас. Авиация соҳасидаги экспертларнинг фикрича, бунга ердаги шароит, учувчининг қўнишдаги ҳаракати ва шасси билан боғлиқ муаммолар сабаб бўлган бўлиши мумкин.

#Торонто #самолёт