Қўшимча функционаллар
-
Тунги кўриниш
Марко Рубио Путинни қотил ва ҳарбий жиноятчи деб атаганди. Энди «Россия билан ҳамкорлик учун ақл бовар қилмайдиган имкониятлар» ҳақида гапирмоқда
Йил давомида унинг риторикаси қандай ўзгариб борди?
Leon Neal / Getty Images
2022 йил февралида Россия ва Украина ўртасида кенг кўламли уруш бошланганида, Марко Рубио Флоридадан сайланган сенатор ва Сенатнинг разведка бўйича қўмитаси раиси ўринбосари эди. У ўшанда жуда кескин баёнотлар берганди: АҚШ Украинани бор кучи билан қўллаб-қувватлаши шартлигини таъкидлаган, Владимир Путинни ёлғончи ва ҳарбий жиноятчи деб атаган, у билан музокаралар олиб боришга уринганларни масхара қилганди. Уч йил ўтгач, Рубио АҚШ давлат котиби бўлди ва унинг риторикаси ўзгарди.
2022 йил 24 феврал
↓
Россиянинг Украинага кенг кўламли босқини бошланганди.
2022 йил 25 феврал
↓
Шундай гап оммалашди: «Агар биз Украинани НАТОга қабул қилмасликка рози бўлганимизда, буларнинг барчасидан қочиш мумкин эди». Бу умуман ундай эмас. Путин ўз шартларини эълон қилди. Ва бу шартлардан бири — 1997 йилдан кейинги даврда НАТОга аъзо бўлган барча давлатлар ундан чиқиши керак. Ёки ҳеч бўлмаганда, НАТО қўшинлари 1997 йилдан кейин алянсга қўшилган барча мамлакатларни тарк этиши керак. Бу Руминия, бу Литва, Болтиқбўйидаги барча мамлакатлар. Бундан унинг истаклари тушунарли: балки бу мамлакатларни тўғридан тўғри бошқармас, лекин улар Беларусга ўхшаш бўлиши — унинг таъсир доирасида бўлиши керак. Ўйлайманки, бундай бўлмайди, деб қатъий айтишимиз керак.
Fox News телеканалига интервюдан
2022 йил 26 феврал
↓
Кўпроқ маълумот беришни истардим, лекин ҳозирча фақат шуни айта оламан: Путинда нимадир нотўғри экани кўпчиликка аён. У доимо қотил бўлган, аммо ҳозир унинг муаммоси бошқа — ва муҳим. Путин беш йил олдин қандай реакция кўрсатган бўлса, ҳозир ҳам шундай бўлади, деб ўйлаш хато бўларди.
2022 йил 2 март
↓
Путин учун «музокаралар» — унинг арсеналидаги яна бир қуролдир. У улардан ўз рақибига зарар етказиш ва ўзининг ҳолатини яхшилаш учун фойдаланади.
2022 йил 5 март
↓
Украинага босқингача ҳам бўлгани каби, хорижий давлатлар етакчилари Путин билан гаплашиш учун Москвага учишда давом этмоқда. У эса уларни бармоғида айлантиришда давом этмоқда.
2022 йил 7 март
↓
Россиянинг Украинага босқинига ўн кун — ва бир нарса барчага аён: Путин бу мамлакатни осонлик билан ишғол этолмайди ва уни бошқара олмайди. Россияликлар у ерда экан, уларни бомбалар, мерганлар ва ўлим кутиб олади.
2022 йил 9 март
↓
Ғарбда кўпчилик ҳали ҳам Путин — ёлғонга уста эканини тушунмайди. Унинг «гуманитар» мулоҳазалар билан иши йўқ. Ҳатто қандайдир «ўт очишни тўхтатиш» бўлса ҳам — бу фақат у бундан ўзи учун қандайдир стратегик ёки тактик фойда топгани учундир.
2022 йил 10 март
↓
Тез орада Россияда ҳамма нарса ўзгара бошлайди. Импорт қилиш имкони йўқлиги саноатни фалажламоқда. Бизнеслар ёпилади, ишсизлик тез ўсади. Путин уларга [россияликларга] Украина ҳақида ёлғон гапириши мумкин, аммо у иқтисодиёт ҳақидаги ҳақиқатни яшира олмайди.
2022 йил 17 март
↓
Биз Украинани Россияни мағлуб этишга ёрдам бериш учун қўлимиздан келган барча ишни қилишга эътибор қаратишимиз керак. [...] Путин ютқазиши керак. Ва менимча, у ютқазади — стратегик нуқтайи назардан у аниқ ютқазади ва бу охир-оқибат унинг қулашига олиб келиши мумкин.
Fox News телеканалига интервюдан
2022 йил 25 март
↓
Украинада ҳарбий жиноятчи Путин етказган азоб-уқубатлар барчага аён. Аммо олдинда бизни кутаётган хавф-хатарлар кўпчилик ўйлаганидан ҳам жиддийроқдир.
2022 йил 19 май
↓
Рубио Сенатда Украинага фавқулодда ёрдам пакети ажратиш тўғрисидаги қонунни ёқлаб овоз берди.
2022 йил 22 сентябр
↓
Украинанинг ишғол этилган ҳудудларида уларнинг Россияга қўшилиши бўйича «референдумлар» ўтказилиши арафасида Марко Рубио бир гуруҳ сенаторлар таркибида бўлажак аннексияни тан олмаслик тўғрисидаги қонун лойиҳасини конгрессга киритди. Қонун лойиҳаси ҳаракатсиз қолди.
Ҳеч қандай пропаганда ва сиёсий интрига Украинада содир бўлаётган реалликни ўзгартира олмайди. Владимир Путин — бу урушда ҳақиқий агрессор ва у суверен демократик мамлакатни асоссиз эгаллаб олишга ҳаракат қилмоқда. АҚШ Путиннинг даъволарини тан ололмайди: бу Хитой Коммунистик партияси каби бошқа авторитар режимлар учун хавфли прецедент яратиши мумкин.
Қонун лойиҳасини киритишдаги баёнот
2023 йил 16 март
↓
Украинадаги вазият — биз учун энг жиддий таҳдид эмас, лекин уни умуман муҳим эмас деб ҳам бўлмайди. Бу шунчаки бошқа қитъадаги уруш эмас — бу Америкага қанчалик ишониш мумкинлигини текшириб кўришдир. Хитой бизга зарба бериб, дунёдаги энг қудратли давлатга айланмоқчи. Ва улар бутун дунё бўйлаб Америка — ишончсиз иттифоқчи, биз илгари буюк давлат бўлганимиз, энди эса таназзулни бошдан кечираётганимиз, етакчиларимиз кескин баёнотлар беришни яхши кўриши, лекин уларни ҳаракатлар билан мустаҳкамламаслиги ва нохушликларнинг дастлабки белгилари бўлиши биланоқ шунчаки қочиб кетишимиз ва иттифоқчиларимизни тарк этишимиз ҳақидаги даъволарни тарқатмоқда. Ва рақибларимиз ҳам бунга ишонишади. Айнан шунинг учун Путин Украинага бостириб кириб ҳам сувдан қуруқ чиқаман, деб ҳисоблаган. [...] Шундай қилиб, ҳа, 1 дан 10 гача бўлган шкалада Украина 10 эмас, лекин нол ҳам эмас. Ишончли эканимиз ва нуфузимизни тасдиқлаш учун Украинага ўзини ҳимоя қилишда ёрдам бериш — бизнинг манфаатларимизга мос келади.
2023 йил 19 сентябр
↓
Марко Рубио ва яна икки республикачи сенатор конгрессга Halting Enrichment of Russian Oligarchs and Industry Allies of Moscowʼs Schemes to Leverage its Abject Villainy Abroad Act (Москва режаларини қўллаб-қувватловчи рус олигархлари ва саноатчиларининг хориждаги пасткашликларини тўхтатиш учун уларнинг бойишини чеклаш тўғрисидаги) қонун лойиҳасини тақдим этди. Номнинг қисқартмаси — HEROIAM SLAVA. Қонун лойиҳаси ҳали ҳам конгрессда ҳаракатсиз турибди.
АҚШ ҳеч қачон Путинни ва унинг ахлоқсиз урушини қўллаб-қувватламайди. Бизнинг ахлоқий бурчимиз ва миллий хавфсизлигимиз манфаатлари шундан иборатки, Россия режими Америка пуллари билан бойиб кетмаслиги учун қўлимиздан келган барча ишни қилишимиз керак. Бу қонун лойиҳаси Путин ва унинг малайларини Америка капиталига яқинлаштирмаслик ва ундан ёвузлик йўлида фойдаланмаслик учун керак.
Қонун лойиҳасини киритишдаги баёнот
2024 йил феврал
↓
Рубио Украинага 60 миллиард долларлик ёрдам ажратилишига қарши овоз берган республикачи сенаторлар қаторида эди. Улар Украинага ёрдам кўрсатишни АҚШнинг Мексика билан чегарасини мустаҳкамлашни молиялаштириш билан боғлашган.
2024 йил 3 март
↓
Россия Федерацияси Путин аввалбошдан хоҳлаганидек Украинани — бутун Украинани ёки Украинанинг ярмини — эгаллаб олиши имконсиз. Бошқа томондан, реаллик шундаки, Украина Россияга нисбатан ўлчамлари ва у билан рақобатлаша олиш қобилияти жиҳатидан кичик. Идеал маънода ҳеч бир томон ғалабага эриша олмайди.
Мен узоқ вақт бундай очиқ гапирмасликка ҳаракат қилдим, чунки бу Америка иттифоқчиси — уруш олиб бораётган Украинанинг позициясини заифлаштириши мумкин эди.
Агар Путин ўзини устунликка эга деб ҳис қилса ва қандайдир куч билан Украинани амалда сателлит-мамлакатга айлантира олишини ҳис қилса, украинлар ундан ҳеч нарса ололмайди — у айнан шуни хоҳлайди.
Менимча, биз Украинага ёрдам беришимиз керак, фақат чегараларимизни мустаҳкамлаб, Америкага ёрдам берганимиздан кейингина.
Fox News телеканалига интервюдан
2024 йил 5 ноябр
↓
Доналд Трамп АҚШ президентлиги сайловларида ғалаба қозонди. Рубио сайлов кампанияси бошидан буён уни қўллаб-қувватлади.
2024 йил 6 ноябр
↓
Уруш кимга керак? У [Трамп] уруш тугашини хоҳлаётганини айтмоқда. Бизнесмен сифатида у сизга ўзининг музокаралар олиб бориш тактикаси ҳақида гапириб бермайди. Лекин нега бу уруш тугашини истамаслигимиз кераклигини тушунмаяпман. Уруш тугашини исташ учун Владимир Путиннинг мухлиси бўлиш шарт эмас. [...] Уруш реаллиги бор. Байден маъмурияти буни очиқ тан олмайди, лекин уларнинг ўзлари ҳам сизга айтишади: биз умидсиз ҳолат учун тўлаяпмиз. Украинлар Россияга катта жасорат билан қаршилик кўрсатишди, аммо уруш боши берк кўчага кириб қолди, биз бунинг учун пул тўлаяпмиз — ва бу вазиятга ечим топиш керак. [...] Бу Владимир Путиннинг ишларига қойил қолишимиз керак дегани эмас, лекин қандайдир соғлом фикр керак.
2024 йил 13 ноябр
↓
Доналд Трамп Рубиони АҚШ давлат котиби этиб тайинламоқчи эканини эълон қилди.
2025 йил 18 феврал
↓
Рубио Ар-Риёдда Россия билан музокараларда Америка делегациясига раҳбарлик қилди.
Ҳар қандай низони тўхтатиш учун барча томонлар ён бериши керак.
Агар бу можаро мақбул тарзда якунланса, Россия билан ҳамкорлик учун ақл бовар қилмайдиган имкониятлар очилади: ўзаро манфаатли масалалар бўйича геосиёсий ва, тўғрисини айтганда, бутун дунёга фойда келтирадиган ва узоқ муддатли истиқболда бу икки муҳим давлат ўртасидаги муносабатларни яхшилайдиган иқтисодий ҳамкорлик.
Музокаралар якунидаги брифингда
Тинчлик музокаралари
