Зеленский: «Американинг прагматизмидан умид қиламан»

Бу 13 февралдан бери Зеленскийнинг илк видеомурожаати бўлди. Президентнинг нега узоқ вақт видео чиқармагани расман изоҳланмаган, аммо у шу даврда халқаро сафарларда бўлгани маълум.

Зеленский ўз мурожаатида Трампнинг махсус вакили Кит Келлогнинг Киевга ташрифи, НАТО бош котиби Марк Рютте ва Франция президенти Эммануэл Макрон билан мулоқоти ҳақида сўзлади. Шунингдек, у «Американинг прагматизми» ва дунё тинчлик учун бирлашишига умид қилиб қолишини таъкидлади.

«Бугун Украинадаман. Ҳарбийлардан фронтдаги вазият, Курск операцияси ҳақида маълумот олдим. Йигитларимиз позицияларни сақлаб турибди ва шу орқали давлатимиз суверенитетини ҳимоя қилинмоқда.

Бугун армиямиз учун янги буюртмалар устида кўп иш олиб борилди. Бу бизнинг ички ишлаб чиқариш ҳажмини оширишга қаратилган — янги шартномаларни ишлаб чиқмоқдамиз.

Сиёсий жиҳатдан ҳам муҳим кун бўлди: армия қўмондонлиги, разведка ва вазирлар билан бир қатор учрашувлар ўтказилди. Бу учрашувлар АҚШ президенти вакили — генерал Келлог билан музокараларга тайёргарлик кўриш учун муҳим эди. Генерал Келлог Киевга аллақачон етиб келган ва Бош қўмондон Сирский, махсус хизматлар раҳбарлари ҳамда Президент маъмурияти вакиллари билан учрашди.

Эртага менинг генерал Келлог билан учрашувим режалаштирилган. Бу учрашув ва умуман, АҚШ билан ҳамкорлик конструктив бўлиши жуда муҳим. Америка ва Европа билан биргаликда тинчликни мустаҳкамлаш мумкин ва бу —бизнинг мақсадимиз. Энг муҳими, бу мақсад нафақат бизники, балки ҳамкорларимизники ҳам бўлиши лозим.

Биз бу урушни илк сониялариданоқ тугатишни хоҳлаганмиз. Мен аниқ ишонаман, биз урушни якунлаймиз — ва бу мустаҳкам тинчлик бўлади. Россия Украинага яна ҳужум қила олмаслиги, асирликдаги фуқароларимиз қайтиши ва мамлакатимиз келажаги таъминланиши керак. Бу ҳар қандай миллат учун табиий истакдир.

Бугун НАТО бош котиби Марк Рютте билан гаплашдим. Биз ўтган воқеалар ва яқин орада содир бўлиши мумкин бўлган жараёнларни муҳокама қилдик. Унинг маслаҳатлари ва қўллаб-қувватлаши учун миннатдорман.

Америка сенатори Линдси Грэҳэм билан ҳам мулоқот ўтказдим. У жуда конструктив инсон ва унинг ёрдами жуда муҳим. Америкадаги икки томонлама қўллаб-қувватлови учун ташаккур. Биз бу ҳамкорликни давом эттирамиз.

Бугун, шунингдек, Франция президенти Эммануэл Макрон билан гаплашдим. У менга ҳамкорлар билан янги мулоқотлари ва келишувлари ҳақида маълумот берди. Биз учун ишончли хавфсизлик кафолатларини шакллантириш жуда муҳим. Бу ҳамкорларимизнинг умумий вазифаси ва ҳар бир етакчининг фаолияти биз учун қадрли.

Айни пайтда Одессада Россия ҳужумидан кейин таъмирлаш ишлари давом этмоқда. Ҳануз 80 мингдан ортиқ одам электр таъминотисиз қолмоқда, шунча одам иссиқликдан ҳам айрилган. Биз барқарорликни тиклаш учун барча чораларни кўряпмиз ва бу муаммо бартараф этилади. Мамлакатимиз ва халқимиз учун меҳнат қилаётган ҳар бир кишига миннатдорчилик билдираман.

Мен Украина бирлигига, жасоратига, ҳамкорлар билан муносабатларимизга, Европа бирлигига ва Американинг прагматизмига ишонаман. Худди бизга зарур бўлганидек, Америкага ҳам муваффақият керак.

Муваффақият — бирлаштиради. Бизнинг бирга эканлигимиз –келажагимиз учун энг муҳим ҳимоядир. Биз келажакни Путин билан эмас, тинчлик билан кўрамиз.

Бу — бутун дунё учун танлов: кучлилар Путинни танлайдими ёки тинчликни? Тўғри йўл — тинчликни танлаш.

Барча қўллаб-қувватлаётганларга раҳмат!» — деди Зеленский ўз мурожаатида.

Аввалроқ, Трамп журналистларга Зеленскийнинг ишонч рейтинги 4 фоизни ташкил этиши, бу сўров натижаларига тубдан зид эканини айтди. Украина президенти бу дезинформацияни «Россиядан келган» деб атади. Зеленский Трамп «дезинформация маконида» яшаяпти, деган хулосага келган.

Бунга жавобан АҚШ президенти Зеленскийни «сайловсиз диктатор», деб атаб, Украинада уруш бошланишига сабабчи қилиб кўрсатди.

АҚШ вице президенти Жей Ди Вэнс эса Зеленскийга Украина президенти Володимир Зеленский америкалик ҳамкасби Доналд Трампни омма олдида танқид қилмаслиги керак эди, дея таъкидлади.

Вэнсга кўра, Зеленскийга АҚШнинг янги маъмурияти билан мулоқот қилиш бўйича «ёмон маслаҳатлар» беришган. У ҳақорат қилиш орқали Трампнинг фикрини ўзгартиришга бўлган уринишни «жирканч мулоқот усули», деб атаган.